Natural Bridge ta celebra su prome aña desde su renobacion

Posted on 03/16/2017 6:30 pm AST | Updated on 03/16/2017 6:31 pm AST

ORANJESTAD - Cinco decada pasa famia Luydens a establece un refresqueria na Natural Bridge. Aunke no tabatin acceso pa awa y coriente nan a namora di e area, nan a cuida loke tabatin, y cu tempo nan a expande nan negoshi pa inclui diferente servicio. Nan a mantene e area di Natural Bridge limpi y brinda diferente servicio na bishitantenan di un di e brugnan natural mas famoso na mundo.

Den transcurso di añanan nan a dicidi cu a bira tempo pa pasa nan compania na un otro operador, na uno cu ta balora y respeta nos cultura y tradicion nan. Uno cu lo tuma over e trabao nan duro cu e famia Arubano aki a haci pa hopi aña y cu lo sigui contribui grandemente na e desaroyo di Aruba su turismo.

Na fin di aña 2015 De Palm Tours, cu ta un compania netamente Arubiano, a dicidi di cumpra e edificio y inverti algun miyones di florin pa asina por renoba tur e facilidadnan. Nan a agrega diferente aspecto pa duna realce na e luga. A expande, y a pone airco y hasta musica den e bañonan, como cu esaki ta e motibo principal pa cualkier persona cu ta bishita e sitio drenta den e edificio.

A duna folklore, historia y cultura di Aruba un luga prominente den e renobacion; a duna e edificio aspecto di un cas Arubano tipico, y a agrega hopi potret di Carnaval, aspectonan local y splicacion di diferente momentonan historico den e decoracion. Tanto e turistanan como bishitantenan local ta keda encanta tur ora cu nan bishita nan.

Giomar Nunes , kende actualmente ta manager di operacion di e facilidadnan, ta splica cu den un luna druk, den temporada di barco crucero, Natural Bridge ta ricibi mas of menos 40 mil turista.

E beyesa di naturalesa, un bista impactante, un luga puro ta trece retonan cune. Y privilegio di tin un “adres” na Natural Bridge sigur tin su retonan, esta cu no tin coneccion di awa ni kabel di coriente cu ta yega na e sitio. Tur cos di coriente, incluyendo e airconan, ta draai riba generator y tur dia ta bin truck di awa pa trece awa limpi pa uza pa e bañonan, y pa muha mata, Nunes ta splica, e generatornan ta draai 24 ora pa dia, shete dia pa siman.

P’esey mes ta cobra turista $1 pa uza baño y residentenan di Aruba ta paga Afl. 1, asina nan ta garantisa cu e bañonan semper ta limpi y den bon condicion.

 

E mural ta un atraccion grandi, y Nunes ta invita nos hendenan local tambe pa haci uzo di e oportunidad pa saca potret na nan mural di e Natural Bridge original, pa pone esaki riba paginanan di medionan social cu e hashtag “#naturalbridgearuba” y asina mustra e bista bunita aki na henter mundo.

Tambe Nunes ta splica cu lo tin un special pa nos localnan pa dia 18 di Maart. Pa celebra e ocasion special aki, Natural Bridge ta invita comunidad pa bishita nan snackbar durante di nan recorido di festividadnan pa descansa y disfruta di e bunita y impresionante costa panort y purba e dushi pastechinan di cabaron y di calco, traha specialmente y unicamente pa Dia di Himno y Bandera. Ademas, lo tin diferente snack tipico Arubano riba menu y prijs special riba “beer bucket”. Corda cu tur prijs riba nan menu ta bira florin pa tur local y mester paga 1 Florin (envez di 1 dollar) pa por usa e baño.

Ban disfruta y aprecia di tur loke nos naturaleza tin pa ofrece y sea semper orguyoso di biba riba e pida baranca aki.

  • LaSorte: AHATA preocupa si tin empleo pa miles di camber extra

    LaSorte: AHATA preocupa si tin empleo pa miles di camber extra

    ORANJESTAD – Loke cu AHATA ta preocupa di dje ora cu toca e tema di moratorium, y e aspecto di tin miles di camber extra, ta cu lo no tin (suficiente) empleo. Asina CEO di AHATA, Tisa LaSorte a bisa NoticiaCla recientemente den un entrevista. E tema ta esun di momento di ‘moratorium’, unda cu un partido tin un campaña pa ehecuta e moratorium, mientras cu di otro banda, gobierno a sigura cu pa otro aña esaki lo keda concretisa pa medio di un ley. Di otro banda, tin un cantidad di camber comprometi, cu tin cu bin. Y aki ta unda cu AHATA su CEO ta preocupa pa e efecto particular di empleo. Recientemente den un comunicado, nan a mustra cu nan ta pro un moratorium. 

  • Presupuesto di ATA pa aña 2019 presenta y entrega na minister

    Presupuesto di ATA pa aña 2019  presenta y entrega na minister

    ORANJESTAD - Durante e ultimo lunanan, varios reunion interno a wordo teni y tambe proyeccionnan y plannan pa 2019 a wordo discuti entre socionan di turismo, cu Hunta di Supervision di A.T.A. y dentro di e ekipo di A.T.A. mes. Despues di a considera aspectonan riba nivel di maneho di turismo nacional, despues di a revisa entre otro recomendacionnan di AHATA, y despues di a conduci analisisnan respectivo y consulta cu e ekipo interno durante un proceso extenso, A.T.A. ta continua cu e proceso di aprobacion formal presentando y entregando na Minister di Turismo Danguillaume Oduber e presupuesto y plannan pa 2019, esaki dia 10 di october 2018 ultimo. Conforme ley, A.TA. tin cu entrega su presupuesto y plannan no mas tarda cu 1er di september na Hunta di Supervision.

  • AVP y MEP awor den tagana pa informacion usa di Banco Central

    AVP y MEP awor den tagana pa informacion usa di Banco Central

    ORANJESTAD – Y atrobe tin un ‘tangana’ entre e dos partidonan politico mas grandi di Aruba, AVP y MEP. E biaha aki, ta e asunto di cifras di Banco Central di Aruba (CBA), y si un den un presentacion recien di e lider di e partido berde Mike Eman a usa cifranan real di CBA of si nan tabata fabrica of no. E asunto a haya mas peso diadomingo ora cu diripiente lider di fraccion di MEP Rocco Tjon a produci un carta di Banco Central (dirigi na minister di finanza Xiomara Ruiz), cu ta clarifica cu ‘e graficonan usa den e presentacion di Eman, no ta procedente di Banco Central. Y como tal nan  (CBA) no por asumi ningun responsabilidad pa nan. Cu esaki Tjon kier mustra cu Eman lo a usa cifranan ‘fabrica’. Miembro di fraccion di AVP Richard Arends como reaccion na NoticiaCla, ta confirma cu enberdad no ta graficonan di CBA, pero nan propio grafico, pero e cifranan si ta di Banco Central. Pues ningun momento a ‘fabrica cifra’, segun Arends.  

  • Triple A a yama Conviasa bon bini diabierna

    Triple A a yama Conviasa bon bini diabierna

    ORANJESTAD – Aruba Airport Authority N.V. (AAA) a yama e capitan y tripulantenan di e aeroliña Conviasa bon bini diabierna mainta. Nan ta cuminsa asina cu un itinerario di 2 buelo seminal entre Aruba y Valencia riba diabierna y dialuna. Diabierna (awe) mainta tabatin e prome buelo cu a yega Aruba, cu a keda ricibi cu e acostumbrado recepcion.  

  • ATA: Turismo pa Aruba a aumenta cu 1.9% y entrada pa camber di hotel cu 11.7%

    ATA: Turismo pa Aruba a aumenta cu 1.9% y entrada pa camber di hotel cu 11.7%

    ORANJESTAD – Aruba a yama bonbini na un total di 809.314 bishitante ‘stay-over’ durante e prome 9 luna di 2018. Esaki ta 1.5% (+11.857 turista) mas compara cu e mesun temporada pa 2017. Si exclui e bishitantenan di Venezuela, por mira un aumento di 6.6% (+48.005 turista) cual ta igual na un total di 774.449 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Colombia pero tambe Chile y Italia, entre otro. Pa september, Aruba a ricibi un total di 76.017 bishitante stay-over, cu ta 2.1% (-1.627 turista) menos compara cu e mesun luna aña pasa. Excluyendo bishitantenan di Venezuela, por mira cu esaki ta 6.7% (+4.408 turista) mas cu ta igual na 66.090 bishitante pa nos isla pa september 2018.

  • CAFT: Aunke presupuesto 2019 ta cumpli cu norma, mester mas medida

    CAFT: Aunke presupuesto 2019 ta cumpli cu norma, mester mas medida

    ORANJESTAD – Mientras cu gobierno di Aruba ta cumpli cu e norma di deficit financiero pa 2019, (-0.5%), e colegio di supervision financiero di Aruba (CAFT) ta recomenda 4 medida pa tuma, entre otro den cuadro di gastonan di personal pero mas cu bista riba e finansas publico sostenible. E conseho di 6 pagina largo di e colegio di supervision riba e presupuesto 2019 a keda publica diahuebs riba nan website.  Y e colegio ta remarca tambe cu ainda no tin un protocol firma cu ta duna CAFT legalmente e autorisacion pa controla e presupuesto pa 2019. E siman aki ainda prome minister Evelyn Wever a duna e noticia cu CAFT a aproba e presupuesto 2019. Loke e no a bisa ta kico e puntonan di atencion ta cu gobierno mester traha ariba, aunke el a bisa si cu tin punto cu mester traha ariba. 

  • Powered by SETAR