Eman contento cu resultado di eleccion Hulanda

ORANJESTAD – Prome minister Mike Eman ta contento cu e resultado di e eleccion na Hulanda di ayera. Asina el a declara na Aldrich Croes durante e entrevista di dia na HITS 100FM. Aunke cu e partido VVD no ta liga na partido AVP (e partido ruman ta CDA:red), e ta contento toch cu e populismo negativo no a afecta Hulanda manera tabata e caso na Merca y Inglatera (Brexit). Eman ta mira e desaroyo cu tanto CDA y D66 a bay dilanti, un punto positivo.

CDA Y D66 DEN GOBIERNO

Eman ta premira cu ambos partido, cu e ta considera cu ta partidonan cu tin interes di Aruba na pecho, lo por forma parti di e gabinete nobo, y cu esey lo beneficia e relacionnan entre Aruba y Hulanda. Segun Eman, na 2014 ora cu tabatin e crisis entre Hulanda y Aruba (welga di hamber, no firma presupuesto etc) ta partidonan D66 y CDA a confronta e gobierno di VVD y defende nos isla, y tambe personalmente Eman tambe. El a indica cu e lo ta na Hulanda proximamente pa celebracion di ArubaDag, unda cu lo tin reunionnan tambe y e lo tende con lo bay cu e interes di Aruba den e proximo gobierno nobo di Hulanda. Fuente: Noticia di dia, HITS 100 FM.