Calendario di evento celebracion Himno y Bandera

ORANJESTAD – Manera ta custumber pa añanan caba diferente centro di bario, establecimentonan y organisacionnan ta organisa varios evento cultural rond nos isla den cuadro di celebracion di nos dia nacional di Himno Y Bandera. Riba 18 di maart nos ta celebra cu na aña 1976 nos a inaugura oficialmente nos Himno, Aruba Dushi Tera, y Bandera.

Den colaboracion cu Departamento di Cultura di Aruba y comunicadonan riba rednan social, Aruba Tourism Authority a crea un calendario di evento pa cu esaki. Asina un y tur por tuma nota di kico tur tin pa haci riba 17 y 18 di maart. E calendario di evento aki tambe lo wordo comparti na nos bishitantenan via canalnan existente, asina encurashando nan pa tambe forma parti di nos gran celebracion, y experencia nos bunita cultura.

Pa prome biaha A.T.A. ta crea un calendario di evento digital uzando Google Maps, algo nobo y sigur uno innovativo. Via e pagina di Facebook, Oficina di Turismo, A.T.A. lo ta compartiendo un link unda por wak tur evento riba e mapa di Aruba cu tur informacion necesario. Asina ta facilita tur cu tin un smartphone pa navega e diferente eventonan den cuadro di dia di Himno y Bandera. Ademas, A.T.A. lo ta agregando mas evento na e mapa di Aruba durante dia asina esaki yega na nos atencion.

Cu e calendario di evento A.T.A. kier invita pueblo henter pa sali y celebra nos dia nacional conhuntamente cu famia y amigonan. Por subi nos pagina di Facebook (Oficina di turismo) pa mas informacion. Si bo evento no ta aparece riba nos lista, por manda un email cu e informacion di esaki pa Ms. Boekhouwer na s.boekhouwer@aruba.com pa asina agrega esaki ainda. Por haya un miho bista di e lugarnan cu tin actividad, via e link AKI