Banco a extende garantia pa Southwest Development Group

ORANJESTAD - Southwest Development a haya un extension atrobe di Aruba Investment Bank, pa keda cla cu nan asuntonan financiero. For di e representantenan di Southwest Development, NoticiaCla.com a haya e confirmacion diasabra merdia. "Nos a haya tres luna mas di tempo den cual nos tin cu keda cla cu e tramite pa e parti financiero" e representante (cu a prefera di keda anonimo) a confirma na NoticiaCla.com, y tabata visiblemente alivia ora cu e la bisa NoticiaCla.com e noticia aki. Esaki kier men cu pa fin di november e desaroyadornan mester ta cla cu nan asuntonan y si no, e ora si nan ta perde e garantia. 

Mes momento minister di Turismo Otmar Oduber a confirma e noticia ora cu a aserca su persona diasabra. "Enberdad a extende e optie pa Southwest. Banco tin confiansa cu lo por keda cla dentro di poco" Oduber a bisa NoticiaCla.com. Mes momento e mandatario a mustra cu tur hende ta gana si un proyecto asina bin dilanti. Cu e desicion aki, e chensnan pa e grupo desaroya e hotel, ta keda na bida. Tabata e siman aki ainda cu NoticiaCla.com a bin cu e informacion cu tabatin chens cu e garantia pa Hard Rock Hotel wordo extendi. Sinembargo, te cu diabierna, no tabatin nada confirma si enberdad e grupo Southwest Development lo a haya un extension atrobe, no obstante cu gobierno a sigura cu esaki lo no ta e caso. “Ami no a haya nada confirma” Otmar Oduber a sigura NoticiaCla.com diabierna mainta ainda. Segun e mandatario, tur cos tabata depende si Aruba Investment Bank (AIB) ta dispuesto pa extende e garantia” Oduber a sigui bisa. “Esaki lo ta a base di nan evaluacion”. Esaki tabata nifica cu tin posibilidad cu por tin un extension si banco bay di acuerdo.

E fecha cu e garantia ‘final’ cu e grupo a haya pa presenta nan carta financiero, tabata poni pa vence, ta diasabra 30 di augustus proximo. Si pa e fecha aki no tabatin nada di e grupo, gobierno lo ‘claim’ e garantia aki cu resultado cu e ta haya e 2.5 miyon dollar cu e grupo a pone como garantia. Si esaki a  tuma lugar, e ta nifica tambe fin di e proyecto hotelero y cu lo a benta e edificio abou. Algo cu posiblemente no ta necesario mas, mirando e desaroyo nobo aki, unda cu ta mustra cu tin un luz na horizonte atrobe.