Sydow: Para proyecto Zoetry Isla di Oro no ta un opcion awor

ORANJESTAD – Para e proyecto di Zoetry Isla di Oro (un inversion di 50 miyon dollar), no ta un opcion aworaki. Asina desaroyado di e proyecto Franz Sydow a splica NoticiaCla.com. E proyecto ta encera desaroyo di Isla di Oro den un proyecto hotelero estilo bungalow riba awa. Sydow a comparti e resultado di e investigacion di medio ambiente riba e area, y a mustra cu e resultadonan no ta sorprende. ‘Resultado ta bisa cu algo mester wordo haci. E area ta den peliger, e mangrove ta muriendo, e coralnan ta na peliger’. Sydow a splica cu esey ta loke e resultado di investigacion haci riba e parti di medio ambiente rond di e area pa wordo desaroya, ta bisa.

TRAHA HUNTO CU GOBIERNO Y NGO

“Nos como un institucion, ta dispuesto pa hunto cu gobierno, pa contribui hunto cu e NGO’s pa forma un directiva y traha como socionan pa salba e area aki” Sydow a bisa. A reuni cu varios NGOs pero e unico cu no kier reuni cu nan ta Aruba Birdlife Conservation di Greg Peterson, y Sydow no ta compronde pakico. ABC ta opone e proyecto aki fuertemente.

PROME EVALUACION TABATA CORECTO

Segun Sydow, basa riba e evaluacion inicial, nan ta haya cu nan a haya rason awor. “Por ehempel, tin algun area di e mangrove na Isla di Oro cu ta muriendo. E ta hopi sushi, nan (e mangrove) ta sofocando pa tur e sushi, y no tin circulacion di awa. Algo tin cu circula e awa pa e mangrove por ta na bida y sigui crece” Sydow a bisa, algo cu nan a bisa caba na comienzo. Adicionalmente segun Sydow, tin cu crea un ambiente di coral nobo, y esey ta costa placa. Algo cu segun Sydow, nan ta dispuesto pa inverti aden y tambe pa mantene esaki durante e tempo. “Nos a gasta 500 mil dollar den e investigacion ambiental y e tempo cu a hinca aden. Pero nos tin hopi confianza cu gobierno ta sostene nos. Nos kier feedback. A propone proteccion pa 16 area. Nos ta kere den e proteccion ey. E area mester proteha.

ISLA DI OTRO PARTI DI E 16 AREANAN PROTEHI

Sydow a admiti cu e area cu e ta den desaroya ta un di e 16 areanan cu mester bin proteccion. Y pa por sigui traha cu e area ey, Sydow kier un ‘partnership’ pa asina bin cu un win win situacion. Hunto lo haya un guia di kico tur por haci pa logra esaki. E desaroya a mustra cu tin paisnan unda cu tin areanan cu ta protegi, pero cu toch tin resorts ariba. Entre nan, e ta mustra Jamaica, Mexico, Costa Rica y mas pais. E ta papia di e experiencia di bungaloo riba awa. Algo cu segun Sydow no ta algo nobo, pero algun interesante.

PROYECTO TA CORIENDO CU RETRASO

Basa riba e informacion cu Sydow tin aworaki, e ta premira cu den posibel 3 pa 4 luna e por cuminsa construi. E tin e placa, e tin e plannan y tur loke mester wordo introduci na DOW pa nan duna e aprobacion pa construccion por cuminsa. “Nos intencion ta pa gobierno finaliza e ROP (Ruimtelijke Ontwikkelings Plan) mas lihe cu ta posibel, pa nos por cuminsa. E timeframe tabata 2 aña pasa. Nos ta kere cu tur cos por cuminsa den 3 pa 4 luna. E ROP lo mester wordo entrega den e proximo luna of algo asina” Sydow a sigui bisa. For di eynan, lo dura 2 aña di construccion y ta mira cu pa 2019 e proyecto por ta cla. Berdad cu nan ta coriendo tras di schedule, pero nan lo no retira nan plan. “Nos ta na un punto di no retorno” Sydow a sigui bisa. “No cuminsa e proyecto, no ta un opcion aworaki” Sydow a finaliza bisando.