United Airlines ta uza Aruba como ‘stop’ pa Caracas, pa seguridad

HOUSTON - United Airlines ta planeando pa incorpora Aruba den su itinerario pa Caracas otro luna, pa motibo di seguridad. Segun e portal renombra di aviacion internacional ch-aviation, United ta incorpora e ‘stop tecnico’ aki riba su buelo di Houston pa Caracas pa motibo di preocupacion pa seguridad den e capital Venezolano y ta uza Aruba pa cambia nan tripulacion envez di laga nan pasa anochi na Caracas.

ITTINERARIO

E schedule ta mustra cu entrante 4 di april proximo, e buelo lo para un ora na Aruba prome cu e sigui pa Caracas. E tin un ora pa haci su ‘turnaround’ na Caracas, prome cu e sigui nonstop pa Houston.    

MOTIBO PA USA ARUBA

E portal ta cita e travel blog ‘Boarding Area’ mas alew, cu ta sugeri cu e razon pa uza Aruba pues ta pa sigura e seguridad di e tripulacion, aunke ningun anuncio oficial a bin di parti di United. Segun e blog, e condicion na Venezuela a empeora di tal forma cu e aerolinea no kier laga su tripulacion pasa anochi na Caracas como parti di e operacion. E intencion e ora awor ta pa durante e break na Aruba, cambia e tripulacion, pa e tripulacion ‘nobo’ bula pa Caracas, y bek pa Houston e mesun dia, sin cu nan ta haya problema cu nan ta bira ‘illegal’. Un tripulante por bula solamente tanto ora, prome cu nan bira ‘illegal’, esta cu nan no ta autoriza mas pa bula pasobra nan a pasa nan cantidad di ora cu nan ta permiti pa traha.

PIKI PASAHERO FOR DI ARUBA?

United no tin e asina yama 5a libertad pa y di Aruba, pues e no por piki y/of laga pasahero riba e ruta aki, pues no por piki of laga pasahero na Aruba durante e buelo ey.

CARACAS TA PELIGROSO

A raporta cu Caracas ta wordo considera como un di e ciudadnan mas peligroso na mundo. Fuera di United, Delta Air Lines, American Airlines, SBA Airlines, y Dynamic International Airways tambe ta bula e ruta pa Caracas, Venezuela. .