Estatua Padu Lampe, Rufo Wever y Lio Booi instala riba Plaza Padu

ORANJESTAD – Estatua di Padu Lampe, Rufo Wever y Lio Booi ta instala riba Plaza Padu. Diasabra e prome mandatario Mike Eman a keda henter dia presente y activo den transporte di e estatuanan for di tayer di e artista na Turibana, pa nan luga riba e monumento na Plaza Padu na Oranjestad. Mas cu 12 ora a tuma pa por a keda cla y na tur momento Eman tabat'ey pa duna un man, coordina esfuersonan y percura cu e trabou ta haci.

For di mainta tempran a bay cerca artista Ciro Abath pa realisa e transporte di e estatuanan na un manera masha cuidadoso. E vehiculo di carga a haya asistencia di Cuerpo Policial cu a habri caminda y a yega safe na Playa. Pa medio di un grua y cu ayudo di varios persona, a lanta e piesanan cu precaucion pa pone nan riba e plaza. For di eynan a cuminsa cu e trabou di instalacion.

Loke inicialmente a pensa di ta bay tuma djis un par di ora, a comberti den un hazaña cu a transcuri durante henter mainta, atardi y comienso di diasabra anochi. E motibo ta hustamente e atencion cu a pone na tur detaye, for di con ta cubri e estatuanan y con ta pone nan riba e truck, te na con nan ta wordo baha bek y instala na e posicion final.

Plaza Padu tin un importancia sumamente grandi no solamente pa dedica e honor aki na Padu Lampe pa tur loke e ta nifica pa Aruba, pero tambe naturalmente pasobra e inauguracion di e plaza ta e coronacion di renobacion di centro di ciudad y di e restauracion di centro di gobernacion.

Mientras tanto e trabounan ta continua den preparacion pa e ceremonia grandi di inauguracion cu tin programa pa diabierna awo 17 di maart. For di 6’or di atardi e ceremonia ta cuminsa y ta consisti di diferente aspecto manera presentacion di nos artistanan local, presencia di e propio Padu Lampe y e gran desvelo di e estatuanan di su persona hunto cu co- compositornan di nos himno nacional, Rufo Wever y Lio Booi.