Gobernador di Aruba a habri ‘Aruba DOET 2017’

ORANJESTAD – Gobernador di Aruba Alfonso Boekhoudt a efectua su prome apertura di e evento di boluntario ‘Aruba DOET’ diabierna mainta na Huize Maristella. Ela haci esaki den forma di pinta un camber. “Nos comunidad ta wordo sosteni riba e pilar di boluntarismo” Boekhoudt a bisa. “Ta hopi importante cu nos tur ta haci uzo di e ocasion aki pa tuma e tempo pa nos por duna nos mes nos forsa, loke nos por pa nos por yuda na e trabou boluntario”. Gobernador a mustra cu nos no ta haci e trabou pasobra nos tin tempo, pero “pasobra nos tin e curason na e bon lugar, nos tin stimacion pa nos prohimo y pasobra nos ta haya e otro su balornan importante pa nos mes”. Despues di su discurso, Gobernador a haci un recorido den e centro y despues mas den dia, un biaha mas cu su staf di gabinete, a duna un man na un otro scol.