Gobierno a oficialisa fecha pa proximo eleccion di Aruba

ORANJESTAD – Fecha pa proximo eleccion parlamentario ta 22 di september, y fecha pa entrega lista ta 4 di augustus proximo. Cumpliendo cu e rekisitonan stipula den nos leynan, Gobierno di Aruba a emiti un Decreto Gubernamental caminda ta regla e fechanan clave pa cu eleccion 2017. Durante Conseho di Minister di diabierna mainta, Prome minister Eman a firma e documento aki den presencia di otro coleganan Minister di Gabinete Mike Eman II. Di e manera aki ta establece cu dia di eleccion na Aruba ta diabierna 22 di september 2017.

E mesun Decreto Gubernamental aki ta indica tambe e fecha pa Entrega di Lista di Partido na Conseho Nacional Electoral, cu ta diabierna 4 di Augustus 2017. Escogencia di e fecha di eleccion ta un decision di Conseho di Minister teniendo na cuenta cu e temporada di Herfstvakantie e aña aki ta cuminsa den ultimo siman di september y cu e proposito di facilita tur votador e oportunidad di eherce nan derecho constitucional. "Como Prome Minister esaki pa mi ta un momento importante. Ta di dos biaha cu mi tin e honor pa decreta fecha di eleccion pa pais Aruba. Un dia di hubilo pasobra esaki ta un dia democratico unda cu destino di e pais ta den man di e pueblo", Eman a bisa na su salida di reunion di Consenho di Minister.

Cu e fecha conoci, departamentonan publico concerni manera Censo, Servicio di Post y Cuerpo Policial, entre otro, por haci e preparacionnan necesario. Pais Aruba ta sigui e stapnan conforme su sistema democratico.