Dowers: Dentro di 3 pa 6 luna lo introduci e ‘ESTA di Aruba’

ORANJESTAD – Gobierno ayera a firma e acuerdo cu Gamma Research pa cuminsa traha riba e proyecto di un ESTA estilo Aruba. ESTA na Merca ta un sistema di control pa bishitantenan yena prome cu nan yega e pais en cuestion. Un persona cu kier drenta Merca p.e., tin cu registra su mes via internet y a base di e informacion cu tin riba e persona, Merca ta dicidi si ta permiti’e entrada of no. E ta un forma pues cu e pais anfitrion por ‘screen’ e personanan y dicidi si nan ta haya entrada na e pais. Aruba tambe kier introduci esaki, pero no manera Merca. Minister encarga cu e proyecto Arthur Dowers a splica e diferencianan cu esun di Merca. “E sistema Mericano tin database robusto gekoppeld na dje caminda cu bo ta pasa den masha hopi sistema, momento cu bo solicita un ESTA” Dowers a bisa. “Den nos caso e ta diferente pasobra nos no tin tur e databasenan na nos disponibilidad ainda” e mandatario a sigui bisa.

DRENTA NA VIGOR

Segun e mandatario, e intencion ta pa e ESTA di Aruba drenta na vigor mas lihe cu ta posibel. “Nos a pidi tres luna, e compania (cu ta encarga pa desaroya e programa) a pone 6 luna. Pero nos ta keda den e periodo ey pa keda cla. Lo tin periodo pa test esaki tambe obviamente. Ta analisando si ta implementa e programa pa tur bishitante of ta introduci esaki pa cierto lugarnan prome. “Importante ta pa sa cu e aña aki ainda lo introduci esaki”, e mandatario a finaliza bisando.

GARANTIA PA STOP HENDE DI DRENTA

Cu e visaplicht pa Colombia a reduci entrada pa cierto hendenan cu tin intencion negativo. Den caso di ESTA, e ta limita tambe entrada pa cierto hendenan pa drenta Aruba. Bo por mira tambe na cierto paisnan cu tin forma pa identifica si un persona ta un risico pa un otro pais y por blokea su entrada asina.