Aruba a caba sinti temblor di 5.6 riba scala di richter

ORANJESTAD – Gran parti di Aruba a sinti un temblor basta fuerte pa nos termino, cu a sacudi varios edificio brevemente. Director di MEteo Marck Oduber a confirma na NoticiaCla.com cu e temblor a sosode 9:50 am y e forsa tabata 5.6 riba scala di richter pero e por varia. Segun Oduber ora cu un temblor ta mas cu 4.0, e ta wordo sinti sigur y ta varia di magnitud. Un dia prome caba Aruba y Corsou a sinti un temblor, pero di forsa 4.8 riba scala di richter. E no ta considere inusual, ya cu Aruba ta den un region cu por ricibi temblor semper. “Esun di ayera tabata mas debil, pero e ta un situacion cu por sosode” Oduber a bisa. E hecho cu hopi hende a raporta cu nan a sinti algo, ta pone cu e ta enberdad wordo sinti mas cu normal. Interesante ta cu e temblor di awe a sosode casi mesora di ayera (9:29 am) y na e mesun lugar, esta 12.13 grado noord y 69.60 grado west, y riba un profundidad di 21 km bou tera.

A SINTIE VARIOS CAMINDA

Varios lector di NoticiaCla.com a raporta cu nan a sinti’e. Entre otro San Nicolas y Palm Beach, pues full Aruba. Hendenan na Elmar a raporta cu nan lesenaar a move y tembla, mientras cu na FTA tambe personal a mustra cu nan a sinti e lesenaar tambe move. Informacion preliminar ta bisa cu na e.o. DIMAS y Setar tambe e temblor a wordo sinti. Otronan ta raporta cu no solamente nan a sinti’e sino cu ela dura largo.

TEMBLOR DI AYERA

Un temblor a sacudi e region di Caribe, incluyendo Aruba y Corsou caba diahuebs mainta. Segun servicio meteorologico di Aruba, e temblor a sosode 9:29 am y a midi 4.8 riba scala di richter, aunke esaki ta varia di for di 2.3 pa 4.8 riba e scala di richter. Na Corsou tambe tabatin informacion di esaki, y ta raportando cu varios area e.o. Koraal Specht, Zeelandia, Mundo Nobo y Parera a sinti esaki. Na Aruba no ta conoci unda tur esaki a wordo sinti. E epicentro tabata 12.13 grado noord y 69.60 grado west, y riba un profundidad di 21 km bou tera.