Fiscal a pidi 3 aña y mei di prizon pa polis acusa di violacion

ORANJESTAD – E agente policial di fam Bremo a tende fiscal diabierna pidi 3 aña y mey di castigo contra dje. Cargo ta violacion di un persona durante ora di trabou y uzando un auto di polis pa e acto. De hecho tin dos cargo, cu ta violacion y ‘verduistering’ di e Billy y armanan. Hues a cera e caso y ta dicta sentencia dia 30 di maart mainta.

E CASO DI RAPE

Pa loke ta e rape, ta asina cu e sospechoso a bisa cu ela bay e adres unda ta haya e prostitutanan, a acerca uno, a puntr'e si e ta disponibel, a invit'e pa dal un rondje, a bay cu ne, haci sex voluntario, drop e back, cla. E no a paga y no tabatin ningun intencion di ever paga, pasobra e muher ni ta di su smaak. E victima ta bisa cu e tabata na e cas, e polis a bin, a bis'e pa lanta para, pa wak su pasaporte, pa bin cu ne warda pa controla si su papelnan ta na ordo. El a subi patras di e auto di polis. Nada di warda. Ela bay un sitio aleha cu ne, a bis'e cu e ta un polis y cu e tin arma, a fors'e pa haci un acto sexual y a rape e, y djey a bah’e back banda di e cas. Esey ta dia 10 di november. Dia 11 e denuncia a wordo haci. Dia 15 di november e mes polis a presenta na e mes cas cu e mesun cuenta di check paspoort di un otro mucha muher. E ora a detene e polis Bremo.

TRATAMENTO DI FISCAL

Fiscal a bisa cu e sospechoso como polis, den ora di trabou y den auto di polis, a haci mal uzo di e autoridad di polis y a viola e integridad fisico di e victima. El a crea un situacion di humiliacion, miedo y insulto p'e. Ela wordo viola pa un polis, un funcionario cu normalmente bo ta bay cerca dje pa ayudo y di e manera ey e sospechoso a haci daño na confiansa, bon nomber y integridad di KPA. El a probablemente kere cu e persona ta un prostituta y cu e lo no durf di haci denuncia. Posiblemente tin un modus operandi pasobra ela bolbe dia 15 y na september tambe e tabata ey. Pakico cada biaha e tabata bay e cas specifico ey? El a bisa den interogacion nan cu ta pasobra e tin cu controla riba prostitution ilegal, pero nunca ela traha ni un pv tocante esaki. Hues ta dicta sentencia dia 30 di maart proximo pa 8:15 di mainta.