Inselair Aruba optimista cu plan di rescate pa e aerolinea

ORANJESTAD—Manera cu NoticiaCla.com a raporta awe mainta den forma di primicia, InselAir Aruba a haya un asina yama ‘voorlopig surseance van betaling’ di Corte. Esaki despues cu un abogado a pidi bancarota pa e compania. Manera ta conoci tambe, hues a apunta abogado Jeannot de Cuba como ‘bewindvoerder’ di InselAir Aruba N.V. Akinan e directornan di e aerolinea lo por sigui cu nan funcion na unda tur decisionnan manera acuerdo y contrato nan lo mester wordo aproba door di e administrador apunta pa hues. E aerolinea den un comunicado a mustra awe tardi cu nan ta optimista cu e plan di rescate presenta.

INSELAIR ARUBA TA OPTIMISTA CU PLAN DI RESCATE

Segun e aerolinea, desde 2016 nan a cuminsa na restructura su operacion y maneho conforme retonan cu nan a enfrenta cu e caida di mercado Venezolano. Problemanan persistente di ricibi pagonan di benta di ticket di autoridadnan Venezolano a conduci na problemanan di likides. Esaki ta un asunto cu Reino Hulandes mes a dicidi di intercedi.

“Unabez cu a nota e deterioro di e mercado di Venezuela, e aerolinea a cuminsa na a reduci gradualmente, mas rapido cu tabata por, e cantidad di 12 rutanan te cu na 3 ruta activo. Esaki tambe ta inclui re-organisacion di e compania local den gasto y personal. Mientrastanto beneficiarionan principal y maneho di InselAir Aruba N.V. a activa su ‘Plan di Rescate’ pa asina resolve y reanuda un operacion saludabel di e aerolinea. Segun maneho di InselAir Aruba N.V., nan ta sumamente optimista cu negociacionnan andando y ta sigur cu nan lo supera e retonan actual.

FLOTA Y TRIPULACION

Mesun dia cu e decision di hues a cay, maneho di InselAir Aruba N.V. a reuni cu empleadonan di e aerolinea na unda a duna e bon noticia di e veredicto y subsecuente continuacion di e plan di rescate, cu ya ta riba bon caminda. “E crisis financiero, cu wordo causa door di e claim pendiente na Venezuela, ta uno cu positivamente nos lo recupera di dje. Pero pa logra esaki InselAir Aruba N.V. lo mester di tempo pa reactiva su flota y operacion pa asina sigui sanea e retonan financiero. Nos tin hopi confiansabcu pronto tur esaki lo ta tras di lomba”, Sr. Stephan van Spaandonk ta e Chief Executive Officer di e aerolinea ta expresa.

Alaves el a comparti cu e prome avionnan di flota pronto lo wordo permiti pa tuma buelo atrobe, garantisando cumplimiento cu regulacionnan/leynan di aviacion. Tambe equipo lo bolbe cubri e rutanan den excelente condicion tecnico pa asina cumpli cabalmente cu e calidad di servicio y seguridad cu e pasahero y miembronan di tripulacion merece.

Den transcurso di e siguiente simannan e aerolinea lo sigui reuni cu su empleadonan y lo comunica frecuentemente cu medionan di comunicacion. Na e momentonan aki InselAir Aruba N.V. tin un cantidad di 93 empleado y ta cubriendo un total di 3 ruta cu ta inclui Santo Domingo, San Juan y Sint Maarten y tambe ta wet lease cu Insel Air International B.V. (Curaçao). Ta wordo spera cu den e siguiente dianan e rutanan nan aki lo cuminsa wordo reactiva un bez e avionnan wordo aproba pa tuma buelo.