Partido PAS no ta participa na eleccion dia 28 di april proximo

WILLEMSTAD - Den e congreso di partido movemento PAS di diasabra ultimo e organisacion politico a tuma e decision definitivo pa no participa na e eleccion si esaki tuma luga dia 28 di april 2017.

PAS ta para pa patriotismo den nos Pueblo y ta vela pa adelanto social di nos comunidad y den e eleccion di dia 5 di october 2016 a ricibí 3452 voto. E cantidad di voto aki ta haci cu pueblo di Corsou a duna pas tur derecho di existencia segun e partido, y pa ta un actor riba e firmamento politico di Corsou.

Pa PAS participa na e eleccion aki e mester ta dispone di suficiente fondo, un lista di candidato cu potencial pa hala voto y un programa progresivo atractivo.

Den e consultanan cu miembronan di MOVEMENTU PAS a sali na cla cu, no obstante e proposicionnan presenta pa atende cu e asuntu di fondo, te cu diasabra ultimo no ta tin un solucion adecua pa genera lo minimo na fondo pa bay e eleccion. Sin garantia di suficiente fondo no ta consehabel pa PAS participa na e eleccion cu ta plania pa tuma lugar dia 28 di april 2017. P'esey congreso a dicidi cu gran mayoria di voto, pa definitivamente declara cu PAS no participa na eleccion convoca pa dia 28 april venidero. Foto Charles Cooper cortesia Curacao Chronicle.