Colegio Arubano atrobe en busca di rector nobo

ORANJESTAD – Despues cu Stichting Middelbare Onderwijs Aruba (SMOA) no a logra sigura pa sr Claassens bira e proximo rector di Colegio Arubano, nan a habri solicitud atrobe recientemente pa atrobe cuminsa cu un buskeda pa un rector nobo. Loke cu NoticiaCla.com a confirma ta cu e motibo ta cu minister di enseñansa Michelle Hooyboer Winklaar no a bay di acuerdo pa paga e subsidio pa por a paga e rector, y tambe e hecho cu SMOA a perde e caso sumario cu nan a entama contra e mandatario.

RECTOR

For di momento cu Colegio a dispidi di e rector anterior Timmermans, nan no a logra busca un reemplazante cu por a fungi como un rector. Den combersacionnan anterior cu e presidente di SMOA, esta Bart Kool, ela splica cu enberdad a logra haya e persona aki y cu SMOA a haya e persona aki perfecto pa e funcion. A logra convence e persona pa e asumi e funcion. Pero e problema tabata e.o. e edad di e persona, cu ta mas halto cu normalmente ta stipula pa un rector ta. E salario tambe tabata un asunto, unda cu SMOA a pidi gobierno pa ayudo financiero. Sinembargo gobierno no kier a coopera y a nenga di duna e subsidio necesario. SMOA na su turno en busca di claridad riba e posicion di gobierno y pa haya un interpretacion di Corte, a entama un caso sumario contra e mandatario. E caso ey SMOA a perde, pues a bira cla unda SMOA tabata para den e caso aki. Esey a pone cu a bira dificil pa por a cera un contracto final cu e persona cu nan a haya y selecta, esta sr Claasens. Gobierno na tur momento a insisti cu mester logra busca un persona local pa e funcion, siendo cu SMOA ta insisti cu esey ‘ainda’ no ta posibel. Si nan tabata habri pa cuminsa un sorto di entrenamento pa personanan cu ta cualifica, pa sigui e estudio extra pa ora cu ta asina lew, den e proximo posibilidad por garantiza cu un local, yiu di tera por bira rector di e scol. E aviso nobo ta encera cu e persona cu haya e funcion, cuminsa pa e temporada nobo escolar di 2017/2018