Retiro di abogado di ‘abogado falso’ Gibbs a pone corte pospone caso atrobe

ORANJESTAD – Pa di dos biaha hues a pospone e caso di e abogado ‘falso’ R. Gibbs awe mainta. E biaha aki tabata pa motibo cu e abogado Zarra a retira su mes di e caso, y partidonan no tabata na altura na tempo pa por a logra haya otro abogado. Como tal hues a pospone e caso aki pa dia 13 di april pa 2’or di merdia. Biaha pasa a pospone e caso mirando cu Gibbs ta un pashent di dialyse y cu riba e fecha ey, tabata su fecha pa haci e tratamento.

FALTA DI COMUNICACION

Awe mainta Gibbs a bisa cu tin falta di comunicacion y como tal e no a haya sa na tempo cu e abogado a retira di e caso, pero cu e tin un abogado nobo caba. Fiscal den e caso aki a mustra cu ta un dia prome ela bin tende cu e abogado a retira. Hues a splica cu e tempo poni, ta duna ambos partido suficiente tempo pa prepara nan mes adecua pa e caso aki.

HOPI INTERES

Por a nota manera e biaha pasa caba, cu tin hopi interes den e caso aki mirando e impacto cu e persona aki a crea pa hopi hende. NoticiaCla.com a nota cu riba e documento di corte, oficialmente tin 22 nomber di sea persona of instancia cu ta demandando Gibbs pa a perhudicanan. Entre nan tin te hasta gobierno, den caso minister di permiso, hasta gabinete di gobernador, y raad van state. Tur a wordo perhudica pa e persona aki, cu a pone cu e interes pa e persona aki paga pa su actonan, ta halto. E biaha aki sinembargo no tabatin hopi hende den e sala, compara cu biaha pasa ora cu no tabatin caminda di pone hende. A compronde cu e lista di persona of instancia perhudica, ta mucho mas cu ‘djis 22’, y ta papia di riba 50.