Douane Aruba a ground avion di InselAir Aruba brevemente

ORANJESTAD – Dialuna merdia InselAir Aruba a bolbe haya un setback breve ora cu un avion Fokker 50 di InselAir Aruba a keda ‘geground’ temporalmente dialuna merdia, riba orden di departamento di douane. Tanto director di douane Ricky Croes como CEO di InselAir Aruba Stephan van Spaandonk a confirma e noticia pa NoticiaCla.com. Pero ya e problema a keda regla y e avion a keda laga ‘den libertad’, segun van Spaandonk.

MOTIBO DI GROUND AVION

E motibo cu douane tabata esun pa ground e avion tabata mesun motibo cu otro instancianan a y ta poniendo beslag riba e compania aereo. “Nos a traha afspraaknan (cu InselAir Aruba) pero nan no ta cumpliendo. Nos a tene e avion abou pa nos por papia cu nan” Croes a sigui splica e portal aki. Pa loke ta CEO di InselAir Aruba, el a splica cu tabata un grounding breve. “ E cuenta atrasa a wordo paga y e avion a wordo release mesora” van Spaandonk a sigui bisa.

PAGO NA TRAHADONAN INSELAIR ARUBA

Mientrastanto manera cu e portal aki a raporta for di diabierna siman pasa, ainda e aerolinea local no por a paga su trahadornan. E rumor cu tabata circula, informando cu e aerolinea a paga solamente su personal di oficina y su personal di tera (ground personnel), pero no su personal di cabina a keda desmenti. “ E informacion no ta corecto. Ningun personal di InselAir Aruba a haña su salario ainda” van Spaandonk a sigui bisa. Falta di fondo pa motibo di paro di buelo for di januari a pone cu e compania no ta generando fondo y como tal no por paga su trahadornan. Y awor cu ATA (e ultimo cu a pone beslag riba cuentanan di e aerolinea na Aruba) a pone beslag, Corsou no por haci ningun transferencia di fondo pa por paga e trahadornan na Aruba. Van Spaandonk a bisa e portal aki den weekend caba, cu nan ta wardando e ‘injeccion financiero’ di Corsou, pero debi na e beslaglegging, esaki ta imposibel