Rey Willem Alexander lo abstene di vota dia 15 di maart

DEN HAAG – Rey Willem Alexander tin derecho di voto, pero lo no uza su derecho pa e proximo eleccion pa Tweede Kamer dia 15 di maart proximo. Asina e oficina di relacionnan publico Hulandes a informa. De hecho, su casa, Reina Maxima y mama di e Rey, Princesa Beatrix tampoco lo haci uso di nan voto. E motibo duna, ta pa asina sigura cu nan ta keda totalmente imparcial na e sistema electoral.   “E Rey tin derecho di voto, pero e no ta use, pasobra e ta imparcial. Mescos ta conta pa Reina Maxima y princesa Beatrix.”

SECRETO

Otro miembronan di Cas real cu pa 15 di maart tin 18 aña of mas bieu, a haya nan carchi di votamento den nan buzon. Fuera di Willem Alexander, Maxima y esey ta principe Constantijn y su casa Laurentien y princes Margriet y Pieter van Vollenhoven. Nan por bay vota, of si nan opta pa no kier wordo ‘mira’, ta apodera un otro persona pa vota pa nan. Con cu para, nan no mester tin miedo pa hende sa pa ken nan a vota. Esaki pasobra pa segun constitucion, eleccion ta tuma lugar cu votamento den tur secrecia. No obstante esaki, toch e Rey, su casa y su mama no ta vota, pa evita cualkier duda di imparcialidad di e hefe di estado.

TRADICION

Pa tradicion, den pasado abstencion di voto tabata comun den Cas Real, unda cu Reina nan Wilhelmina, Juliana y Beatrix nunca a vota. Ni entre 1917 y 1970 ora cu tabatin un obligacion pa ley pa vota. Di otro banda ora cu Juliana no tabata Reina mas, e si a vota. Tambe prome cu el a bira Reina, el a vota. E asunto a bira un discusion politico y popular den comunidad.

SPLICACION DI REY

Recientemente Rey Willem Alexander a duna un splicacion riba e tema aki. Segun e Rey ta netamente pasobra e votamento ta secreto, e ta keda sin vota. Esaki pasobra si e bisa mes cu el a vota blanco, e duda por keda. Si e votamento no tabata secreto, e por a mustra cu e ta vota blanco. Pero awor esey no por, pues e unico forma di ta sigur cu hende ta kere su imparcialidad, ta door di no bay vota.