Agresion di maestro no ta algo nobo segun sindicato

ORANJESTAD – For di siman pasa ora cu e noticia di agresion di un maestro, causa pa n mayor rabia, esaki a crea hopi reaccion den comunidad. For di minister di enseñansa, politiconan, pero tambe sindicato a critica esaki severamente. Sinembargo, segun sindicato di maestro, esaki no ta prome biaha cu esaki ta sosode. Asina sindicato di maestro Simar ta sigura pa medio di un comunicado. “Hopi ta bisa cu ta increibel cu un mayor ta tribi di subi tereno di scol cu intencion premedita di agredi un maestro. No! No ta increibel. E ta un realidad amargo, cu tur dia maestronan ta teme pa sosode cu nan” e sindicato ta bisa. Segun e sindicato, e impacto di e suceso aki riba empleadonan den enseñansa ta grandi y hopi ta frustra y disgusta cu loke a tuma lugar. Hopi ta puntra nan mes ta cuanto y kico mas nan mester tolera.

PREOCUPACION DI SINDICATO

Cu un maestro a actua debidamente of no cu su alumno no ta e caso. Loke ta concerni SIMAR ta e seguridad den e edificio cu yama scol.                                                                              “ No ta prome biaha cu algo asina ta tuma lugar y cada biaha e ta bira mas y mas grave”. Cada maestro ta pidi tur dia pa no haya nan mes confronta cu problema di e indole aki. Peor ainda ta spera cu nunca lo haya nan mes confronta cu morto violento na pia di trabou. Segun e sindicato, no por generaliza, pero respet pa maestronan di scol a baha drasticamente, tanto door di alumno, como di mayor. Esaki debi na mentalidad di mayornan awendia y door di educacion y falta di norma y balor for di ceno di cas. Problemanan social ta refleha den schoolnan di tur tipo y ta parti grandi di frustracion di maestronan cu mester atende esakinan y uza hopi tempo na educa en bes di duna les.

SIMAR a trece dilanti na diferente minister di enseñansa y di husticia y na comision di enseñansa di parlamento, cu mester duna extra castigo na agresornan di maestro di scol. Esaki pa planta mas respet, cu a bay perdi den transcurso di añanan.

SEGURIDAD DI ALUMNONAN

Tambe a bisa na varios ocacion cu nos mester percura pa seguridad di alumnonan y di cada maestro na pia di trabou. Mester tin security na entrada di cada scol y mester percura pa infrastructura ta cuadra cu exigencianan stipula den ley. No obstante cuanto esaki ta costa. Mas cu claro ta preferible inverti directamente den enseñansa, manera Minister di Enseñansa a menciona den un comunicado, pero seguridad di esnan cu ta forma e ciudadanonan cu ta futuro profesionalnan di bo pais, no tin prijs.                                                                                                                                               Directiva ta desea e maestro agredi pronto recuperacion y hopi forsa na su persona y na su coleganan.