Implementacion restructuracion salarial maestronan atrobe ‘on hold’

ORANJESTAD – Sindicato di maestro SIMAR ta disgusta cu e implementacion restructuracion salarial di maestronan atrobe ta ‘on hold’ .  E sindicato ta mustra de un comunicado cu segun planificacion e sistema salarial nobo mester a drenta na vigor desde 1 di januari 2017. Esaki despues cu na diferente ocacion a aplaza e fecha di implementacion caba.

Segun e sindicato, como “stakeholder” di e comision Restructuracion Salarial ta cuestiona e proceder di minister di enseñansa, Sra. Michelle Hooyboer-Winklaar, ya cu tin cierto palabracionnan haci cu cualnan mester cumpli. Un di nan ta e deber di informa tur partido concerni pa e implementacion por cana mas facil y sin incertidumbre. Na e momentonan aki tur reunion di e comision ta para pa motibo cu ministerio di enseñansa mester duna contesta riba e preguntanan treci dilanti den parlamento na luna di december, na momento di a trata e ley di restructuracion. Te awe ainda e ministerio no a duna contesta. Ultimamente e representante di SIMAR den dicho comision, a haci varios intento pa drenta den contacto cu director di Departamento di Enseñansa, alaves presidente di e proyecto, sin por a comunica cu su persona. Tambe a acerca e representante di Minister den e comision kende na su turno no ta duna informacion concreto pa cu un fecha di reanudacion di e trabaonan.

Un otro palabracion haci den e comision ta cu ningun partido lo no sali cu informacion di implementacion riba nan mes y cu tur lo sali unanimamente na momento di implementacion pa evita mal comprendemento y mal informacion. Minister di Enseñansa ta e prome yama pa duna informacion.

Por compronde cu trabaonan ta andando y cu tin factornan cu por trece cambio den e fecha di implementacion. Loke SIMAR ta lamenta ta cu Minister no ta sali dilanti cu informacion concreto riba esaki, pa asina esnan concerni por ta na altura di e desaroyonan.

SIMAR ta spera cu Minister Hooyboer-Winklaar y su ministerio por keda cla pronto cu contesta riba e preguntanan haci den Parlamento pa asina e comision por reanuda su trabaonan.

Tambe ta di spera cu Minister por anuncia e fecha nobo di implementacion pa asina empleadonan den enseñansa por tin mihor bista riba kico Restructuracion Salarial ta encera.