Unico comisarionan cu no a haya retiro di gobierno, ta di airport

ORANJESTAD – Cu excepcion di e comisarionan di Aruba Airport Authority NV, comisarionan di por lo menos 2 otro NV di gobierno y un Sui Generis a wordo retira entrante 1 di maart ultimo pa medio di un carta di gobierno. For di fuentenan cerca di e proceso, a compronde cu mientras cu Gobierno a manda un carta di retiro pa tur e comisarionan di e diferente instancia manera ANSA, ATA y otronan, esunnan cu si a ‘scapa’ ta AAA, pa evita cu nan ta haya problema cu Schiphol Group cu ta e compania cu ta maneha e aeropuerto.

RETIRO COMISARIONAN NA ATA TA ILLEGAL

Esun mas problematico ta na Aruba Tourism Authority mirando cu aki no ta trata di un NV sino un compania Sui Generis, y unda cu e comisarionan ta apunta pa landsbesluit y cu no por retira nan sin mas, y mas aun, sin cu a pone un otro na su lugar. Ex minister di turismo Otmar Oduber a condena e acto aki. “Esaki ta nada otro cu persecucion politico” e ex mandatario a bisa NoticiaCla.com. Segun Oduber, mientras cu e otro retiro nan ‘no ta sorpresa’, esun na ATA si nan a dal nan dede duro. Esaki pasobra segun Oduber, Gobierno a ‘lubida’ di check e reglanan den e Sui Generis. Ademas segun Oduber, gobierno a kibra promesa di lo no a persigui e trahadornan cu a traha bou di Oduber. “Alcontrario, hopi intimidacion, hopi persecucion, hopi menaza a tuma lugar” Oduber a sigui bisa.

COMISARIONAN TA HENDENAN RESPETA

Informacion cu e portal aki a ricibi ta mustra indignacion di e forma con cos a sosode. Ta mustra cu ta hungando cu pan di hopi hende, den industria di turismo. Esaki pasobra mientras cu a retira e comisarionan di p.e ATA, no a reemplaza nan, cu riba su mes ta henter un proceso. No ta asina asina ta haci esey y ta pone cu den practica, ATA ta sin un directiva, cu mester tuma decisionnan clave pa nos pilar economico. E hendenan aki den e caso aki, ta representando e accionista cu ta gobierno. Ta hendenan cu a wordo aproba den conseho di minister completo y no pa un solo minister, den e caso aki Oduber. Ademas, den caso di ATA, ta henter un proceso tin unda cu p.e AHATA mester manda su representantenan (pa cada un funcion mester manda dos candidato), y ATA mester pone su candidatonan. Aworaki no tin pues un directiva cu ta pone cu de facto ATA, cu excepcion di e CEO, ta stuurloos. Pa loke ta e ‘timing’, esaki ta interesante si mira cu falta ‘apenas’ 6 luna prome cu eleccion, unda cu por bin (of no) un cambio di gobierno. Pues lo por a laga e hendenan aki keda sinta normal, haci nan trabou profesional pa cual nan a keda apunta, envez di kita nan, faltando apenas e tempo menciona pa eleccion.

COMISARIONAN NO TA KEDA ETERNAMENTE

Ta conoci cu un comisario no ta keda pa semper y tur sa cu nan postulacion por varia cu gobierno. Esey ta un hecho y como tal no mester bin como un sorpresa cu gobierno a haci e cambio aki ora cu e minister di e respectivo departamentonan, a retira e comisarionan. Di otro banda, segun Oduber, a haci promesa cu e biaha aki, lo no haci cambio na e constelacion aki, esta no persigui of perhudica nan. Foto cortesia Caribseek.