Awor A.T.A. a pone beslag riba cuentanan di InselAir Aruba

ORANJESTAD – Despues cu departamento di impuesto na Aruba a kita beslag riba e cuentanan bancario di InselAir Aruba, awor ta Aruba Tourism Authority a pone beslag riba e cuentanan. Esey a impedi e compania aereo di cumpli cu pagonan di salario, cu a conduci diabierna na un protesta breve di e trahadonan. “Esey ta corecto. Mi lo lague na djis un confirmacion” CEO di ATA, Ronella Tjin-Asjoe a confirma pa NoticiaCla.com diasabra atardi. “ Ta di diferente banda a exigi pago y nan (InselAir) a haci pago, y ATA tambe mester a tuma pasonan necesario”. Di parti di e CEO di InselAir Aruba Stephan van Spaandonk, a confirma cu enberdad ainda e salarionan no ta paga y cu e situacion ta mescos cu diabierna.

BESLAG TA STROBA PAGO DI SALARIO

Mas investigacion cu e portal aki a haci ta mustra cu e intencion tabata pa paga salario di e trahadonan di InselAir Aruba for di Corsou. DIMP (dept di impuesto) a kita nan beslag, pa asina no stroba e pago di salario mas, pero mas importante pasobra InselAir Aruba a cumpli cu palabracionnan na e departamento, pa cumpli cu pagonan atrasa. Pero mesora a sigui e beslag di ATA riba e mesun cuentanan. E portal aki a compronde cu tin varios instancia, compania y departamento cu ta wardando pa haya placa di e aerolinea, y cu nan tin miedo cu nan no ta bay haya esaki. Como tal, un tras di uno nan ta para den rij pa pone beslag riba e cuentanan pa asina sigura nan placa. Y tanten tin beslag (di ken cu ta), Corsou (e placa ta bin for di eynan) no por manda placa, pasobra e placa ey ta bay pa e instancia cu a pone beslag, envez cu e aerolinea haya placa pa paga e trahadornan.

INSELAIR ARUBA NO TIN PLACA

InselAir Aruba mes no tin fondo mas, cu ta pone cu ta necesario pa Corsou yuda. Y e motibo ta simpel. “ Nos no tin entrada desde nos flota ta para fin di januari. Nos ta wardando riba un "financiele injectie" di nos accionistanan” van Spaandonk a sigui bisa. Pues esey ta e motibo cu ta wardando placa for di e compania madre. Mes momento van Spaandonk a sigura si cu tur servicio pa cliente ta funciona normal, ‘manera semper’.

TRAHADONAN PREOCUPA Y RUMOR RIBA DIVISION

Mientrastanto trahadonan a mustra nan preocupacion pa cu pago di nan salario. Informacion cu tabata circula, ta cu lo tin un division entre accionistanan na Corsou. Un grupo lo tabata pro InselAir Aruba y otro no. Y un di e problemanan lo tabata cu un di e gruponan no kier pa InselAir Aruba sigui opera y cera operacion. Y cu pesey tambe no kier a manda e placa for di Corsou pa Aruba. Tur esaki sinembargo a keda desmenti na NoticiaCla.com for di fuentenan cerca di e situacion y a sigura e portal aki cu ‘no tin ningun division’ entre Aruba y Corsou. E problema ta e asunto di beslag y ‘nada mas’.