Gobernador tin sosten completo di Conseho di Minister di Reino

DEN HAAG/ ORANJESTAD - Gobernador di Aruba tin sosten completo di Conseho di Ministro di Reino. Esaki ta pa kita tur duda cu por tin cu gobernador di Aruba su decision pa no firma e presupuesto, no tabatin e sosten necesario di Hulanda y Reino. For di Hulanda, NoticiaCla a haya confirmacion aki diasabra mainta di parti di representante di Minister Ronald Plasterk.

‘Cu e no firmamento directo di e presupuesto, Gobernador di Aruba ta actua completamente den su competencia. “E tin sosten di Conseho di Ministro di Reino, y tambe e apoyo completo di Gobierno Hulandes, ministro presidente Rutte y di ministro di Relacionnan di Reino’, segun ministro Plasterk (BZK) den un reaccion riba informacionnan. Por a compronde cu e hecho cu gobernador a manda un reaccion diabierna, indicando cu e no a actua riba orden di Conseho di Minister di Reino pa para e firmamento, a crea un impresion cu e lo ta actuando su so, y cu consecuentemente e no tin sosten di conseho di minister di Reino. Algo cu awor pues ta resulta cu no ta berdad.

Cu e declaracion aki, gobernador ta haya mas forza tambe y gobierno di Aruba tin cu mira con nan ta bay atende cu e asunto awor. Esaki pasobra premier Eman a mustra cu mientras cu e ta respeta gobernador como persona, nan tin cu bay evalua cu e.o. Raad van State, e funcion di e instituto di gobernador, riba su autoridad den cierto casonan specifico manera esun cu a desaroya e siman cu a pasa.