Presupuesto 2015 no ta na tempo, jaarrekening si

ORANJESTAD – Mientras cu e presupuesto 2015 no a keda cla pa wordo entrega na tempo, diabierna gobierno a logra entrega e jaarrekeningen di 2013 si prome cu 1 september. Segun e ley di contabilidad, tanto e ‘jaarrekening’ di aña anterior como e presupuesto di aña venidero mester wordo entrega prome cu 1 September. “Nos no ta logra entrega e presupuesto per 1 September sin embargo e tardanza lo ta mas bien algo di un par di siman y no di hopi luna tampoco”, Minister di finanza Angel Bermudez a confirma.

Pa loke ta e tardansa di e presupuesto 2015, Bermudez a sigura cu e parti conceptual di e presupuesto 2015 ta biniendo cla caba.” Sin embargo mester keda pendiente riba e firma di Gobernador pa cu e presupuesto actual, cu lo por tuma luga den e proximo simannan di September mescos cu e rapport traha pa loke Bermudez ta yama e “backoffice” di CFT”. Na momento cu esaki tuma luga, Minister Bermudez ta finalisa y entrega e presupuesto di 2015.

OPOSICION

Partido di oposicion a reacciona riba e entrega aki, mustrando cu segun repaso di e cuentanan aki, ta bira bisto cu Gabinete Eman tin ministernan cu a surpasa nan presupuesto barbaramente y no a pidi autorisacion promer cu a haci e gastonan extra. Parlamentario Xiomara Ruiz ta mustra entre otro cu p.e. e cuenta anual di 2012 ta mustra con Minister Sevinger a surpasa su presupuesto cu 1131%, sin cu Parlamento a dune apoderacion di antemano pa haci esaki. Di manera aki ta viola nos ley di Comptabilidad, ta falta respet y mina e autoridad di Parlamento di Aruba y ta abusa di e confiansa cu Pueblo a deposita den nan. Manera NoticiaCla.com a raporta mas prome diabierna, cu e fecha di e entrega di e rapport final di CFT lo ta dia 12 di september proximo. DespueS gobierno ta haya chens pa evalua esaki durante 3 siman pa duna su comentario final.