Anuncia 3 evento den e mesun siman no ta mucho practico

ORANJESTAD – E siman aki Aruba a wordo inunda cu invitacion pa conciertonan pa e aña aki. E siman aki so, Aruba a tende anuncio di por lo menos 3 evento grandi cu ta conciertonan cu ta tuma lugar uno tras di otro. Tanto e anuncio como e fechanan ta sigui otro hopi cerca. De hecho, durante e ultimo 3 dianan, a anuncia un evento pa dia. Diamars Flip Flop, diaranson a anuncia Aruba Summer Music Festival y awe tardi ta anuncia e line up pa Soul Beach Music Festival. Pa hopi esaki no mester ta un problema, pero promocionalmente e por ta confuso pa e publico.

INUNDACION DI INVITACION NO TA PRACTICO

E forma con esaki a bay, no ta esun mas practico, y ta algo cu e CEO di Aruba Tourism Authority Ronella Tjin Asjoe a admiti cerca NoticiaCla.com. “Idealmente como oficina di turismo nos lo a desea enberdad pa tin un tiki espacio” e CEO a bisa riba e hecho cu ta anuncia 3 diferente evento asina tras di otro. “Pero de facto, no ta un problema. Cada un ta dirigi nan mes na un diferente genero. Y mester bisa cu e dosnan cu oficina di turismo ta envolvi den dje como patrocinador cu placa, cada un tin diferente line up y mercado”.

UN EVENTO NO MESTER CANIBALISA OTRO

Segun e CEO di ATA, no ta e intencion pa e eventonan canibalisa otro. Como tal ATA ta purba di balance. “Sigur nos ta tene na cuenta cu Soul Beach Music Festival ta dirigi su mes primordialmente riba e mercado Mericano. Esnan cu ta fanatico di R&B”. Mientrastanto e Summer Music Festival ta dirigi su mes riba e mercado Latino. “E ta diferente evento y cada uno ta haya atencion di diferente mercado tambe cu ta diferencia di otro.

SUPPORT FINANCIERO

Ora cu ATA ta dirigi su mes riba financiamento di un evento, ta basa nan mes (manera den otro raportahe a atende parcialmente cu esaki) riba e.o. e añanan di existencia di e evento, manera un Soul Beach Fest cu tin un relacion largo cu ATA. Un Summer Fest mientrastanto den su di 3 aniversario, segun ATA a prueba su derecho di existencia caba. “Cada un di nan ta wordo midi riba cantidad di bishitante. Mas aporte financiero, mas nos ta exigi tambe, tanto den PR y balor internacional. Nos ta mara esey, cuantific'e y midi’e”.