InselAir: Mas reduccion di personal y rutanan limita

WILLEMSTAD – InselAir International ta bay corta den su personal. E anuncio a bin diaranson mainta durante un conferencia di prensa na Corsou. No por a bisa di cuanto persona, pero esey lo keda clarifica otro siman ora cu tin un plan cla cu e cantidad bira conoci. E trahadonan mes a keda informa di esaki mas laat den dia tambe. Ademas e CEO nobo Gilles Filiatrealt a anuncia cu e aerolinea ta bolbe na su base, esta haci buelo nan entre islanan ABC y St Maarten. Bulando solamente entre e islanan aki, ta nifica menos personal necesario y esey ta splica e reduccion anuncia. “Nos obhetivo ta aworaki pa mantene e conectividad entre e islanan” Filiatrealt a sigui bisa. “Ta hopi importante pa gobierno di Corsou pa mantene e conectividad”. E compania por uza solamente e flota di avionnan Fokker 50 mirando cu e otro avionnan ainda ta ‘na tera’, osea geground. No tin claridad riba e otro destinacionnan, pero segun e compania, asina cu ‘libera e otro avionnan’, esey por cambia tambe. Segun e compania, no tin duda riba esey, pasobra ta mal negoshi pa no bula e destinacionnan conoci. Mas lihe nan deshaci di e ‘wetleasenan’ actual (avionnan cu ta uzando pa temporalmente bula destinacionnan largo), miho e ta pa InselAir pasobra e lease nan ta saliendo e compania hopi placa. E aerolinea ta insisti cu su avionnan ta safe y ta spera cu pronto por los esaki. Foto ta di archivo di noticiacla durante e prome conferencia di prensa di Filiatrealt na Corsou.