Arends: Rumor cu Technip a bula for di deal pa rehabilita CITGO ta falso

ORANJESTAD – “Mi tambe a tende e rumor ey for di algun tempo atras, pero e no ta berdad” Asina minister di Economia Richard Arends a sigura NoticiaCla.com riba e noticia cu e compania Frances di construccion Technip, lo a bula for di e deal pa rehabilita e refineria di CITGO. Den e columna Bati Bleki, e columnista Rona Coster ta menciona e informacion cu contrario na informacion inicial, e Francesnan a cambia di pensamento y a bula afo ‘pasobra e deal tabata mucho riscante’, y cu ‘ningun hende’ no a tuma nan lugar. “Asina leu cu nos a compronde di CITGO y Technip, tur cos ta segun schedule” Arends a sigura e portal aki.

INTENCION

E intencion inicial tabata pa tanto e compania Frances como esun di Venezuela, Tecnoconsult y Y&V Group cuminsa cu e trabou di rehabilitacion, cu lo mester a tuma 18 luna, y tin un inversion di 700 miyon dollar. E parti ey, segun Arends, no a cambia y ta continua.

CUESTIONA STORIA DI 100 TRAHADO CU BADGE

Algun siman atras, gobierno di Aruba a haci publicacion di e hecho cu 100 trahado a haya nan ‘badge’ porfin y a presenta e informacion cu esey ta nifica cu awor e prome 100 trahadornan por bay traha. Opositornan a cuestiona e acto aki, sugeriendo cu e 100 trahadornan aki, pa cuminsa, no ta Arubiano, y cu nan no ta bay haci e tipo di trabou cu a bisa cu nan lo a bay haci. Ademas, ta cuestiona cu gobierno a haci tanto fanfaria cu partimento di badge di un compania na su trahadornan.