Koeiman: No obstante incidente den Parlamento, situacion politico na Corsou ta stabil

ORANJESTAD – No obstante e suceso di siman pasa den Parlamento di Corsou, prome minister demisionario Hensley Koeiman ta considera e situacion politico di su isla como ‘stabil’. Esey tabata e prome reaccion di e prome mandatario di Corsou riba e incidente den Parlamento siman pasa, pa NoticiaCla.com diamars. E reaccion a bin despues di e consulta anual di Reino na Aruba. “Despues di e suceso di siman pasa, nada no a pasa. E reunion a wordo suspende” Koeiman a sigui bisa. E comentario cu Corsou ta cayendo abou, e no ta comparti. “Nan sa bisa cu un pais ta bay ‘dansend ten onder’. Mi ta kere cu carnaval a bon momento pa e hendenan relaha” Koeiman a bisa, refiriendo na esnan cu ta agita riba e situacion politico. “E pueblo ta den un pressure cooker y mester desahoga, pick up y sigui padilanti” e mandatario a bisa.

CUANTO MINISTER TA DEN FUNCION

Despues cu a tene reunion recien y cu Parlamento lo a manda un cantidad di minister cas, a bin un confusion di cuanto minister realmente ta forma parti di e gabinete awor. “Tin 6 minister funcionando, pero demisionario” Koeiman a sigura e portal aki. E hecho cu Parlamento a emiti algun mocion di desconfiansa, ta pone cu mester a entrega retiro, pero nan ta ‘den consideracion’. “Ta logico pasobra bo no por laga un pais sin gobierno. Kiermen cu nos ta demisionario. Nos ta den e proceso pa nan bay traha na un gobierno interino. Asina cu nan ta cla cu esey, nos ta cla pa bay” Koeiman a sigura e portal aki. Y cu interino, e ta sigura cu ta di awor pa eleccion. No un gobierno cu tin cu sinta e resto di e periodo, eliminando eleccion di april proximo.