Consulta anual di Reino a trata pa resolve problemanan comun den region

ORANJESTAD – Durante e reunion anual di Reino, ministernan di Hulanda, Aruba, Corsou y St Maarten a delibera diamars riba forma con pa ‘fortifica’ nos Reino. Minister Hulandes di relacionnan exterior Bert Koenders tabata satisfecho cu e resultado, y a mustra cu hunto ta e forma pa traha pa ‘interes comun’ y tin mas cooperacion cu otro. A admiti cu tin hopi incertidumbre den region, hopi a cambia y cu un di e preocupacion serio ta e.o. Venezuela. Ta papia di desaroyo den e regio, e temponan turbulento, relacion entre Merca y Venezuela y efectonan di China su presencia den region. Pa Koenders, mientras cu ta aplaudi e iniciativa y e posicion delantera cu Aruba tin riba tereno di desaroyo sostenibel, mester traduci esaki awor den implementacion. A haci mencion di yuda logra haya un status asocia cu e comunidad caribense conoci como CARICOM.

MINISTERNAN DI REGION

Un tras di otro, ministernan presidente di Aruba, Corsou y St Maarten a duna nan interpretacion di e reunion y kico cada un kier pa logra pa nan respectivo isla/region. Aruba a sigura cu mientras cu a yuda bringa pa sigura cu Hulanda haya un asiento otro aña den e conseho di seguridad di Nacionnan Uni, e kier sigura cu Aruba ta beneficia di esaki tambe. St Maarten a repasa su situacion y indica cu p.e cada isla mester mira e beneficio cu ta bon p'e.  Esey por nifica cu no semper e interes di tur ta esun cu ta cumbini nan como isla. Entre nan, cu mientras cu p.e Parlatino tin su beneficio, St Maarten tin miho beneficio cu p.e CARICOM. Corsou tambe a mustra cu hunto mester por yega mas leu y cu e ta spera cu hunto por logra metanan poni dilanti.