ORANJESTAD – Corte den caso cu FTA a entama contra Liv Casino, a dicta cu no ta suficiente pa yega na e conclusion cu den e caso aki tin “traspaso di empresa” manera cu e sindicato a stipula, pa cual motibo a rechasa e peticion di FTA, 28 di februari 2017. Manera ta conoci, corte den Prome Instancia di Aruba a dicta sentencia den e caso cu FTA a entama den nomber di su miembronan, empleadonan di ex-Aura Casino, contra e operadornan nobo di e casino, cu actualmente ta wordo maneha bou di e nomber Liv Casino. -- Den e caso aki FTA a pidi Corte pa declara Liv Casino responsabel pa pago di e salario di e trahadornan pa e tempo cu nan a keda cas sin entrada, como tambe pa dicta cu e trahadornan aki ta den servicio di e operador nobo, di acuerdo cu articulo 1615dc di buki 7a di e Codigo Civil di Aruba, cu ta stipula cu na momento cu e operacion di un empresa wordo traspasa di un entidad legal pa un otro, e entidad legal nobo ta keda responsabel pa e empleadonan, unda cu e empleadonan ta mantene tur nan beneficionan primario y secundario.
TRATAMENTO DI CASO
Durante tratamento di e caso aki Liv Casino a alega primeramente cu e relacion di trabou di e empleadonan lo a wordo termina na momento cu e operador bieu di Aura Casino a cera su portanan. Ademas segun Liv Casino e hecho cu e trahadornan a ricibi nan pago di Cessantia lo ta indica cu no ta existi un relacion di trabou mas. Consecuentemente, segun Liv Casino, no tabatin empleado mas na momento di a tuma over e operacionnan. -- E ponencia aki di Liv Casino a wordo rechasa door di Corte, pasobra e hecho cu SVb a dicidi di paga Cessantia na e empleadonan haciendo uzo di un fecha di terminacion ficticio, riba su mes no ta un prueba cu e relacion di trabou cu e trahadornan a wordo termina. Esaki pasobra ley na Aruba ta conoce un sistema cera pa locual ta regarda terminacion di un relacion di trabou, locual ta significa cu ta unicamente riba e formanan menciona den ley un relacion di trabou por termina. Pago di Cessantia door di SVb no ta un di esakinan. Pa loke ta trata e existencia di un “traspaso di empresa” Corte den Prome Instancia a basa su opinion primordialmente riba e cantidad di tempo cu a pasa entre e momento cu Aura Casino a cera (december 2015) y e momento cu Liv Casino a habri (februari 2017). Mirando e tempo largo cu a pasa no por papia (mas) di un traspaso segun Corte. Esaki ta un di e puntonan cu segun decisionnan di Corte Europeo di Husticia ta di importancia na momento di fiha si tin un “traspaso di empresa” of no. A considera tambe cu e tamaño di e casino a wordo reduci.
SENTENCIA
Di otro banda segun Corte ta un hecho cu e clientela di e casino lo keda mescos y cu un cantidad di e empleadonan a sigui traha cu e casino. E indicadornan aki sinembargo segun Corte no ta suficiente pa yega na e conclusion cu tin “traspaso di empresa” pa cual motibo a rechasa e peticion di FTA. -- FTA di su banda no ta satisfecho cu e decision di Corte di Prome Instancia y teniendo na cuenta cu ta trata aki di un asunto di principio cu ta afecta no solamente e trahadornan en cuestion, pero tambe e clase trahador en general aki na Aruba den futuro, lo apela e decision aki na Corte Comun di Husticia. FTA ta convenci cu den e caso aki ta trata di un “traspaso di empresa”, unda cu ademas no por descarta cu deliberadamente di parti di e operador nobo a keda rek tempo pa asina crea e impresion cu no ta trata di un traspaso. -- FTA ta di opinion cu, contrario na loke Corte den Prome Instancia a indica, e hecho cu no a cumpli cu un di e indicadornan cu Corte Europeo di Husticia ta aplica pa un “traspaso di empresa” no ta haci cu e traspaso ta bira imposibel. Di acuerdo cu e mesun Corte Europeo di Husticia, e lista di indicador no ta limitativo y cu circumstancianan individual ta hunga un rol importante na momento di determina si ta trata di traspaso. Hustamente esaki ta locual lo pidi Corte di Apelacion pa evalua di nobo den e caso di e trahadornan di ex-Aura Casino.
ORANJESTAD – Corte di apelacion a reserva dos siman di luna di mei 2024 pa trata e apelacionan di caso Avestruz. Specificamente lo tin tres huez pa scucha y trata e 7 sospechosonan. Noticiacla a compronde cu e caso ta cuminsa pa 8:30am tur dia y caba 5’or di atardi. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. E hecho cu tin dos siman reserva, no kier kier men cu tur dia lo tin caso, ya cu hueznan por programa algo durante e prome dianan y dicidi eynan, con ta usa e dos simanan mas optimalmente.
ORANJESTAD – Corte di apelacion a mantene e sentencia original di expropiacion di ex minister Paul Croes diahuebs como parti di e caso Ibis, cu un cambio si. Envez di paga AWG 183.489,10 bek, e ta haya un reduccion di 20 mil. Pues e mester paga e suma di AWG 163.489,10 mil florin, of sinta un castigo di prison di 18 luna extra di loke e ta sintando aworaki caba. No ta conoci si Croes lo apela, y e abogado Desiree Croes lo a comunica y delibera cu su cliente mas laat awe riba esaki.
ORANJESTAD – E persona doño inicial di e cacho Blacky cu a haya e nomber despues di Khaleesi, mester presenta dilanti huez dia 22 di mei proximo. Asina corte a informa diahuebs ultimo. Ta trata di e ciudadano Alberto Groeneveld. Ora cu e caso a bira conoci, esaki a haya masha hopi reaccion di comunidad, cu a desemboca finalmente den un caminata di protesta contra maltrato di bestia. Groeneveldt ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.