Visa solamente un posibilidad pa controla migración Venezolano

ORANJESTAD – Ministernan di paisnan di Reino Hulandes no a discuti si ta necesario awor pa implementa un visa pa Venezolanonan bishita Caribe Hulandes. “E situacion na Venezuela ta preocupante!” minister Hulandes di relacionnan exterior Bert Koenders a confirma na NoticiaCla.com diamars atardi durante un conferencia di prensa. Segun Koenders, durante e reunion anual di Relacionan di Reino diamars, a bisa cu visa no ta e unico solucion pa e problema. “Pero mi, nos, no ta descarta nada” e mandatario a sigui bisa, indicando solamente cu e ta keda un instrumento, pero no awor. Segun e mandatario, a ‘construi’ si varios scenario pa por atende e problema di e pais bisiña.

PREPARA PA VARIOS SCENARIO

Segun Koenders, nos mester ta mucho mas alerta cu normal pa cu e situacion, y ta admiti cu e situacion desde su bishita den e region aki a bira pio, pero e preocupacion si no a cambia. Hunto paisnan di Caribe Hulandes y Reino ta buscando mas sistema a haya un miho control di e situacion di migracion di e pais bisiña pa nos islanan.

AYUDO PA SACA FONDO PEGA DI VENEZUELA

Riba un otro pregunta di prensa, e mandatario a admiti mes momento cu en berdad un di e problemanan cu nos islanan ta confrontando, ta e placa di varios aerolinea local cu ainda ta ‘pega’ na Venezuela. E mandatario Hulandes a sigura cu pa medio di embahada Hulandes, ta purbando pa los e fondonan aki tambe. “Nos embahadanan ta lobby pa esaki y ta activo riba e tereno aki caba” Koenders a sigura prensa diamars.