Rick Ross atraccion principal Flip Flop festival 2017

ORANJESTAD - Rick Ross ta e atraccion principal pa e proximo Flip Flop festival 2017. Aruba por a tuma nota cu e aña aki Flip Flop Festival (31 di maart, 1 y 2 di april 2017) a anuncia algun artista cu a cay hopi na agrado manera Morgan Heritage y Konshens. Sinembargo diamars ultimo durante un rueda di prensa a anuncia un di e atraccionnan principal di e festival cu ta e famoso “Rick Ross” di Miami. Ross ta conoci pa ta un di e exponentenan mas grandi di e mundo di Rap/HipHop y actualmente como un artista cu ta figura regularmente den Top 40. Un di su exitonan mas grandi ta “Huslin”. Recientemente e tabata nomina pa un “Grammy Award” pa su colaboracion cu Skrillex. Otro colaboracionan cu e la haci ta cu e.o Jay-Z, Drake, Kanye West, Erykah Badu, John Legend, Chris Brown, T.I. y Future. Otro artistanan internacional cu a wordo anuncia ta for di Hulanda Shermanology, for di New York DJ Cre8 y for di Sint Maarten DJ Outkast. Pa loke ta e atraccionnan local lo conta cu Tsunami, Jeon & Friends, Mystical Connection, DJ Vibes, Yeimy, Renzo M, Nutzbeatz, 101, Phattunez, Whiteboy, Big Rig y Devin. Tur e artistanan aki lo presenta durante 3 dia di festival. Diabierna dia 31 di maart lo tin e fiesta di apertura den Emotions Nightclub cu atraccion principal Shermanology (EDM). Diasabra dia 1 di april na Bushiri Beach Arena e atraccionan manera Morgan Heritage, Konshens y Rick Ross lo ta riba stage. Diadomingo dia 2 di April na Renaissance Marina Pool Deck / Blue Bar lo tin un exclusive Chill Down Pool Party cu diferente DJ Local y algun sorpresa! Tur Super Early Bird ticket a caba dialuna atardi sinembargo e Early Bird Tickets ta obtenibel awor pa 35 florin pa persona pa e main event. Si acaso kier atende tur tres dia di e evento mester cumpra sea un Single VIP ticket (Seccion Standing) cu ta inclui un banchi (acceso) pa tur tres dia of un Mesa di VIP (Mesa di 6 persona).

E carchinan ta obtenibel na Chill Logo Store situa den Renaissance Market Place dilanti Seaport Cinemas (Open 3 pm – 9 pm), Citgo Palm Beach, Citgo Boulevard, Citgo Santa Cruz y Citgo Essoville.