Chens cu garantia Hard Rock Hotel keda extendi atrobe

ORANJESTAD – Tin chens cu e garantia pa Hard Rock Hotel wordo extendi. Sinembargo, no tin nada confirma si enberdad e grupo Southwest Development lo a haya un extension atrobe, no obstante cu gobierno a sigura cu esaki lo no ta e caso. “Ami no a haya nada confirma” Otmar Oduber a sigura NoticiaCla.com diabierna mainta. Segun e mandatario, tur cos ta depende si Aruba Investment Bank (AIB) ta dispuesto pa extende e garantia” Oduber a sigui bisa. “Esaki lo ta a base di nan evaluacion”. Esaki ta nifica cu tin posibilidad cu por tin un extension si banco bay di acuerdo.

Mientrastanto, e fecha cu e garantia ‘final’ cu e grupo a haya pa presenta nan carta financiero, tabata poni pa vence, ta diasabra 30 di augustus proximo. Si pa e fecha aki no tin nada di e grupo, gobierno lo ‘claim’ e garantia aki cu resultado cu e ta haya e 2.5 miyon dollar cu e grupo a pone como garantia. Si esaki tuma lugar, e ta nifica tambe fin di e proyecto hotelero y cu lo benta. Mientrastanto den e matutino Bon Dia Aruba, representante di e grupo Southwest Development group, Milko Baiz a sigura cu nan a manda un carta pa mas extencion pero no a tende nada ainda. No ta descarta un caso sumario pa logra extende esaki toch. Segun Baiz, e ta mustra cu por durante entre 3 pa 5 luna pa haya e confirmacion financiero cu nan tabata buscando, y cu esaki a tarda mas cu a spera. Si ta pa nan, nan lo a cuminsa traha e hotel caba, pero obstaculonan a pone cu ainda nan no a cumpli. E idea ta pa benta e ruina di Bushiri abou, pa traha un hotel 4 strea, maneha pa Hard Rock Hotel.