A bolbe detene tres ilegal Venezolano riba boto drentando Corsou

WILLEMSTAD - Guarda Costa Caribe a detene 3 persona awe marduga, tur tres di nacionalidad Venezolano, ora cu nan tabata yegando Corsou. Algo despues di mey anochi, e operador di radar di e Reddings en Coordinatie Centrum di Guarda Costa a nota un contacto sospechoso zuid di Corosu. A manda un patruya cu un Super-RHIB mesora den direccion di e contacto. Na altura di Vrijgezellenbaai, a toca un boto sin luz tipo yola cu tres persona. Ningun di nan por a presenta un permiso di estadia valido. Tanto e boto como e detenidonan a keda transporta pa e base na Parera unda cu a entrega nan na polis. E caso ta den investigacion.

NO TA PROME BIAHA

No ta prome biaha cu Guarda Costa ta intercepta un entrada ilegal di persona, y no ta prome biaha cu ta trata di personanan di nacionalidad Venezolano. De hecho, recientemente a pone man 'atrobe' riba un boto cu 22 persona Venezolano ilegal, y algun tempo atras un 'cargacion' similar tambe a keda intercepta, di atrobe 22 persona. Pero separa di esey, constantemente ta intercepta boto cu Venezolano yegando Corsou, den un intento pa tin un miho porvenir.