Jacinta Constancia a pone asiento disponibel pa partido MFK

WILLEMSTAD - Mientras cu e ta sigui encarcela, Jacinta Constancia, parlamentario pa partido MFK a pone su asiento disponibel pa MFK. Declaracion di dje cu e ta distancia su mes di e partido, no por a wordo confirma pa e partido. A referi NoticiaCla.com na e comunicado cu e partido a duna y no kier a duna mas comentario. 

DETENCION

Diahuebs atardi manera e portal aki a raporta caba, riba ordo di Fiscal di Ministerio Publico, Constancia a drenta den su periodo di  "encarcelacion preventivo" (in verzekeringstelling) relaciona cu e denuncia di menasa y maltrato. "Encarcelacion preventivo" ta un proceso conforme Codigo di Procedimiento Penal (Wetboek van Strafvordering) cu ta dura 2 x 24 ora maximo pa asina Landsrecherche di Corsou por continua cu nan investigacion. Manera ta conoci, mas prome Costancia a keda deteni despues di a agredi colega parlamentaria Giselle McWilliam den Parlamento. McWilliam a entrega keho, cu a conduci na detencion di Constancia. Constancia a bisa cu ela rabia riba e disertacion di McWilliam, cu a toca su persona como sospechoso riba e caso di mondkapjes cu ela busca, pero cu supuestamente nunca no a aparece tempo cu Constancia tabata minister. Foto cortesia www.Extra.cw