DIMP A para findishi di InselAir Aruba

ORANJESTAD - A consecuencia di informacion cu departamento di impuesto DIMP a ricibi di InselAir Corsou, a dicidi di para e findishi programa pa awe diabierna. Asina  NoticiaCla.com a haya confirma awe mainta. Detayes no por wordo duna, pero ta suficiente pa compronde cu lo a yega na un areglo satisfactorio, cu ta pone cu e findishi no ta necesario mas por lo pronto. 

E FINDISHI

E findishi tabata programa pa tuma lugar awe  diabierna y otro siman diamars y diaranson. A prepara enberdad tur cos pa e findishi tuma lugar. Pero si e plan di InselAir tabata ok, lo   por a dicidi cu no ta sigui cu e findishi. "Si InselAir por cumpli cu e palabracionan haci laat ayera tardi, nos ta para e findishi y e ta un proceso normal cu ta sigui tambe cu cualkier otro cliente" Gomez a bisa diahuebs. Ora cu papia di plan di rescate, no ta asina cu ta un suma so mester pone riba mesa pa evita findishi, sino un plan di pago tambe mester acompañe, a largo plazo. E suma cu ta wordo menciona ta entre 2.2 miyon y 5 miyon. Pero Gomez no kier a menciona e suma pasobra ta trata di casonan individual di cliente. "Nunca belastingdienst por sali bisa tal y tal hende debe tanto cen" Gomez a bisa. Por a bisa solamente cu ta un suma substancial.