CFT ta entrega rapport final dia 12 di september

DEN HAAG – E rapport di e secretariado di College Financieel Toezicht ta presenta su rapport final dia 12 di September na gobernador Fredis Refunjol, cu na su tempo ta presenta esaki na gobierno di Aruba y Conseho di Minister di Reino. Prome cu esey, ta bin e rapport intermedio cu lo keda presenta dia 5 di september na gobernador y na conseho di minister. NoticiaCla.com tin esaki confirma di dos fuente. Gobierno e ora tin 3 siman pa analisa esaki y presenta su comentario” segun Plasterk su declaracion na prensa hulandes diabierna. No ta conoci si ki dia Conseho di Minister di Reino lo trata e rapport, pasobra nan ta reuni dia 5 di september y despues atrobe na october. Esaki no ta kita afor cu lo por tin un reunion ‘extra’ manera cu a sosode den luna di juli caba.

E mandatario a confirma cu e la combersa un ora cu premier Mike Eman diahuebs, y cu mientras cu e combersacion a bay bon, e diferencianan di opinion riba e asunto di presupuesto ta keda. “E investigacion ta continua y esey lo keda entrega comienso di september” Plasterk a sigui bisa (mira e declaracion aki) . E mandatario a reitera un biaha mas tambe cu e gobierno actual a redobla e debe nacional di pais Aruba y ta importante cu mester tin reglanan estricto acompaña pa un maneho rigido pa reduci esaki na un nivel aceptabel.

Mientrastanto segun e website www.tubantia.nl, prome minister Eman ta mustra cu e lo ta dispuesto pa laga Hulanda participa den e presupuesto cu e fin pa drecha e situacion. Segun e pagina web, “Aruba lo traduci e precupacionnan di Hulanda den e maneho financiero”. Noticiacla.com tabata pendiente un reaccion di parti di Premier Eman.