Lopez: Necesidad urgente pa berdad tin un di tres poder den gobernacion

ORANJESTAD - E anuncio cu Marisol Lopez Tromp ta uni cu partido POR, no tabata uno di sorpresa. Awe mainta, manera cu NoticiaCla.com a raporta caba, e anuncio oficial a wordo haci, confirmando e rumor mas grandi politico den hopi tempo. "Loke ta uni nos den forza nobo ta, cu nos tur ta realisa cu Aruba na e momentonan aki tin e necesidad urgente pa berdad tin un di tres poder den gobernacion" Lopez Tromp a cuminsa na bisa. 

FAKE NEWS

Segun Lopez Tromp, ela splica di su experiencia politico den Staten, hopi cos ela observa, haya of keda sin haya y a realisa e posicion y retonan cu Aruba tin y cu e gobernantenan no ta atendiendo manera debe ser. "Nan no ta duna e transparencia ni na parlamento, corda na pueblo, como debe ser riba e topiconan aki, pero ta recuri na presenta e problemanan como cosnan cu ta hopi bon andando, pero tur esaki ta fake". Lopez ta bisa cu e tin e experiencia y a pasa den esaki varios biaha. "Mi ta sinti cu mi no a haya e oido a base di sugerencia cu mi kier a duna y aporta como debe ser" Lopez a sigui bisa. 

RESOLVE PROBLEMA

Segun Lopez, ora cu tin preocupacion, bo no ta resolve esaki cu un propaganda bunita y bisa cu tur cos ta den control, of un propaganda bunita bisando cu ciudadanonan ta felis y contento. "Gobernacion ta mucho mas profundo cu esaki. Bo mester tin un gobernacion confiabel, transparente, y atende e necesidadnan cu tin". 

DERECHO DI CIUDADANO

Segun Lopez, cada ciudadano tin derecho di vota pa e politico cu e ta kere cu por hiba Aruba dilanti y cu e tin confiansa den dje. "Pero no por ta asina cu si bo a expresa bo mes di un otro color politico y bo ta wordo censura of bo ta wordo menasa. No por ta asina cu pasobra bo no ta di e partido politico, bo no ta conta" Lopez a continua bisando. Tambe Lopez ta bisa cu no por ta asina pasobra bo no ta comparti opinion, bo ta wordo hala un banda of kita, senciyamente a base di color politico. "Esaki den e temponan aki ta netamente lo contrario di loke Forza Nobo ta bay haci y ta haciendo y ta duna participacion na ciudadanonan no obstante e color politico bo tin of bo ta" Lopez a sigui bisa. A papia cu si duna e partido confiansa, lo haya no uno sino dos pa 3 asiento cu ta duna e berdadero balance den gobernacion caminda no solamente un partido ta na mando.