InselAir Corsou y Aruba ta sigura cu nan ta cla y safe pa bula

ORANJESTAD - Mientras cu departamento di impuesto ta negociando cu InselAir Aruba pa sali di nan debe of bende articulo na findishi, y cu nan avionnan ta 'geground' ainda, InselAir di tanto Aruba y Corsou a sigura comunidad ayera cu 'nan ta safe y cla pa bula', segun nan comunicado. Segun e aeroliña, articulonan recien den prensa di diferente fuente a revela cu InselAir Corsou ni InselAir Aruba lo ta safe pa bula. "Departamentonan di Aviacion Civil di Corsou como esun di Aruba constantemente ta realisa inspeccionnan riba e forma di opera di e dos aereoliñanan aki" e compania ta sigura. Tambe nan ta bisa cu ambos aereoliña a reacciona di biaha riba hayazgonan di cual nan a wordo avisa y a somete nan medidanan di coreccion eherce, na e Autoridadnan di Aviacion pa nan aprobacion. 

INSPECCION

Mientrastanto bek pa e comunicado, InselAir ta sigura cu nan ta na haltura di e echo cu e Inspeccion Aviacion Civil Hulandes a bishita Aruba y Corsou recientemente y a topa cu representantenan di e dos liñeanan aereo aki, incluso nan Directornan Ehecutivo. "Nan a pidi pa eherce auditnan spontaneo riba cual ningun di e dos aereoliñanan no tabatin nada contra. Contrario na e informacion cu a circula den prensa, local y den exterior, ambos aereoliña te cu awor, no ta al tanto di ningun resultado di e Inspeccion Aviacion Civil Hulandes, cu lo por tin un efecto riba e capacidad pa bula di nan avionnan."

AGRADABLEMENTE SORPRENDI

"For di e resumen ricibi despues di e audit, e inspectornan a bisa cu nan tabata agradablemente sorprendi cu e conclusionnan di e resultado den tur e siguiente areanan: Operacionan di Buelo, Operacion Centro di Control, Seguridad, Training, Sistema di Schedule, Calidad y Mantencion di InselAir Corsou y Aruba" e comunicado ta sigui bisa. 

SEGURIDAD SEMPER PRIORIDAD

E audit independientemente realisa pa Inspeccion Avaviacion Civil Hulandes ta trece pa ambos gerente di e dos aereoliñanan un nivel halto di trankilidad pa loke ta calidad di e inspeccionnan interno realisa pa su personal profesional.

INSELAIR CORSOU Y ARUBA SAFE PA BULA

"Na e momentonan aki, ningun di e aereoliñanan tin cuestionnan tecnico ni operacional cu nan respectivo Autoridadnan di Aviacion" e compania ta sigui bisa. "E grounding di e flota MD na Aruba a surgi pa motibo di un posicion tuma pa Aruba Airport Authority (AAA) den nan sosten na Gobierno di Aruba cu a dicidi di freeze e cuenta bancario di e aereoliña a consecuencia di retraso den pagonan di belasting".