Aruba no ta cla ainda pa fia placa cu condicion faborabel

ORANJESTAD - Aunke cu minister Hulandes Ronald Plasterk a duna minister di finanza di Aruba Angel Bermudez un 'compliment' pa a logra cumpli cu e norma di e deficit di pais Aruba, den wowonan di e colegio di supervision financiero, Hulanda no ta cla ainda pa duna Aruba e posibilidad pa fia placa cu condicionan mas faborabel.  "E ta un paso importante". Pero tin varios pregunta ainda di CAft, pa loke ta e.o. e entradanan pendiente di impuesto y e grandura di aparato gubernamental. Esakinan ta algun punto cu ainda mester traha ariba y cu CAft no ta contento cu ne ainda. "Pero cos no ta asina leu ainda" Plasterk a bisa, pa Aruba por inscribi riba mercado internacional pa fia placa, cu beneficio pa tin e.o. un tasa di interes abou. 

CONSEHO PISA DI CAFT

Segun Plasterk, ela papia brevemento cu minister di finanza di Aruba riba e tema di finanza. "Lo mi ta contento si e trayecto (cu falta pa Aruba cumpli full) por wordo encamina den direccion unda cu por logra un conseho positivo di CAft riba e registro actual (riba mercado internacional) unda cu e gastonan di interes por baha considerablemente. Nos no ta asina leu ainda" Plasterk a ripiti, pero e ta un paso importante. A sigura un biaha mas cu Hulanda lo pisa e conseho di CAft hopi mes, y esey ta bay paso pa paso. Aworaki CAft a mustra cu e parti aki a cumpli cu ne, pero cu no ta unda cu e mester ta ainda. "Riba e puntonan cu falta, Hulanda semper lo tin cu warda ariba, si e ta bin na un conclusion. Mi ta kere cu nos a encamina un trayecto, y cu mi ta contento cu conhuntamente nos a dicidi pa institui CAft, pasobra esey ta e caminda si pa finalmente tin un finanzas publico solido". Segun Plasterk, riba e mercado di capital esey ta pertinente. Scucha e entrevista completo AKI.