Plasterk: Contacto cu Mike Eman ta frecuente y bon

ORANJESTAD - E contacto entre minister Hulandes pa asuntonan di Reino,  Ronald Plasterk y prome minister di Aruba Mike Eman ta(bata) frecuente (desde cu nan a topa ultimo na Hulanda). Asina e mandatario Hulandes a sigura NoticiaCla.com awe merdia durante un conferencia di prensa. "E combersacion cu nos tabatin awe tabata semper bon" e mandatario a sigui bisa, refiriendo despues na e unico encuentro programa cu Eman durante su bishita cortico na Aruba. A señala algun punto cu riba termino corto mester yega na un solucion, manera destinacion di FDA y otro asuntonan. "Pero riba lo esencial di confronta futuro hunto den Reino, nos ta di acuerdo cu otro" Plasterk a sigura e portal aki. 

RELACION PREMIER Y GOBERNADOR

Pa loke ta e relacion entre Eman cu Gobernador Boekhoudt, e mandatario kier a bisa solamente cu e ta contento cu Eman a topa cu Boekhoudt 'recientemente' sin specifica ki dia. No por a confirma e fecha, pero manera cu e portal aki a raporta anteriormente, a compronde cu for di dia cu Gobernador a cuminsa cu su funcion, Eman no a bishit'e manera ta regla. Y ta hopi recien e prome bishita a tuma lugar finalmente . "Mi a compronde cu minister presidente si a bishita Gobernador recientemente, pero fuera di esey mi no ta responsabel pa e agenda di tur hende. Pero mi tabata en todo caso contento di tende esey (cu Eman a bishita Gobernador). 

RELACION ENTRE HULANDA Y ARUBA

Manera cu NoticiaCla.com a raporta anteriormente, tabatin hopi anticipacion riba e bishita aki, mirando e relacion cu tabatin aña pasa entre e dos mandatarionan aki. E declaracion di Plasterk na e portal aki ta bin porta como sorpresa pa hopi, y e accionan di e ultimo dianan tambe a crea un otro percepcion. Entre otro ora cu un potret a cuminsa circula di e auto den cual Plasterk a wordo busca aden na su yegada na Aruba. E no tabata e tipo di transporte usual cu ta wordo usa pa mandatarionan durante nan bishita oficial riba nos isla. A opta e biaha aki pa huur un taxi pa e bishita cortico di Plasterk. Algo cu lo a resulta mas practico envez di e forma di custumbre. Esaki riba su mes a crea speculacion den comunidad, y cierto politiconan a comenta na e portal aki, cu e ta demonstra cu e relacion toch no ta bon, y cu 'no tin confiansa' entre e dos gobiernonan aki. Un reunion cu mester a tuma lugar un dia anterior entre e mandatarionan menciona lo no a tuma lugar, aunke esey no por a wordo confirma pa e portal aki. Ta un hecho cu riba agenda oficial tabata poni pa Plasterk topa awe cu Eman y no ayera, manera a ser informa. "No mester pensa nada tras di e cambio aki", fuentenan cerca di e 'bishita', a sigura e portal aki.

REACCION GOBIERNO RIBA BISHITA

Gobierno mientrastanto riba e bishita, tabata masha positivo y a ilustra e puntonan aki mesora riba e pagina di FACEBOOK di prome minister Eman. " Despues di a reuni pa mas di un ora cu Prome Minister Eman, Minister di Relacionnan di Reino Ronald Plasterk a bisa cu e reunion tabata uno cu a bay masha bon mes. Hopi punto a wordo discuti, cu ta regarda tanto Aruba como Reino henter. Plasterk "Premier Eman is een van de belangrijkste stabiele factoren in het Koninkrijk der Nederlanden." Pa loke ta e rapport di CAft Plasterk a bisa cu esaki a duna como resultado cu Aruba ta cumpli cu e criterianan cu tin y esey ta un 'knap staaltje werk'. ", tabata e comentario di gobierno.