OM: Husticia ta resolve ocho atraco pisa

ORANJESTAD - Bou guia di Ministerio Publico, Cuerpo Policial di Aruba a soluciona e luna aki ocho atraco arma grandi. Den un comunicado diamars atardi, ministerio publico a confirma esaki pa prensa. 

ATRACONAN SOLUCIONA

Ta trata di e atraconan arma na november y december aña pasa y na januari ultimo riba La Estrella, riba Gemstones Jewelers, riba cas di e doño di Lekker Bar en Restaurant, y riba un trahador di SandBar Beach Bar. Den e casonan aki tin nuebe sospechoso den detencion, bou di cual Arubianonan y Venezolanonan. E sospechosonan en cuestion a wordo deteni na december y januari. E sospecho ta cu e grupo, cu tabata encabeza pa personanan biba na Aruba, a actua den combinacion cada biaha diferente. 

ATRACONAN VIOLENTO

Banda di esey, KPA, boh gguia di Ministerio Publico, a soluciona cuatro atraco extremadamente violento na San Nicolas riba personanan di edad halto. Den e atraconan aki, cu a tuma lugar na januari, un pareha grandi y dos cabayero a wordo ataca den nan casnan, y un grandi a wordo ataca riba caya. A uza violencia bruto. Den e casonan aki tin cuatro persona den detencion, tur Arubianonan hoben di entre 17 y 19 aña di edad. E investigacionnan ta ainda andando. Mas detencion, particularmente pa loke ta e grupo Arubiano/Venezolano, no ta wordo exclui. Foto ta archivo di polis di un di e detencionan grandi cu a tuma lugar e luna aki.