Rapport Hulandes (ILT) ta kita aviacion civil di Corsou sunu

DEN HAAG/WILLEMSTAD - Tanto Inselair Aruba y Inselair International no ta cumpliendo cu partinan esencial di ley di aviacion. Pero e problema ta mas cerca e autoridad di aviacion cu mester controla esaki pero no ta capas "Cerca ambos compania (di aviacion) por papia di un risico di seguridad mucho halto, pasobra no ta cumpliendo cu e normanan manera stipula den ley" asina e rapport traha pa autoridad Hulandes (ILT) ta conclui riba e situacion actual di e companianan di aviacion, cu ta den poder di NoticiaCla.com. " E sistema di supervision di autoridad di aviacion tanto na Corsou como Aruba tabata incapas di evita esaki", e rapport ta sigui bisa. Den mesun rosea mester bisa cu e rapport ta practicamente kita e departamento di aviacion civil sunu y  -compara cu esun di Aruba- ta haya un punto hopi malo pa e forma con e ta opera. Den e relato aki ta toca e parti di Corsou y den un otro relato ta enfoca riba esun di Aruba, cu a sali un poco mas positivo di e investigacion. 

DEPARTAMENTO DI AVIACION CIVIL DI CORSOU  (CCAA) 

For di e investigacion, departamento di aviacion civil di Corsou no ta nada positivo. Eyden (e rapport) ta resulta cu e institucion di CCAA (Curacao Civil Aviation Authority) no ta basa riba un base huridico legal. "E base legal di e supervision ta basa riba decretos y mandato individual di inspectornan.Partinan di e legislacion local no ta visiblemente adaptana normanan internacional" e conclusion ta sigui bisa. Asina e rapport ta sigui alerta riba varios 'fayo' cu CCAA ta y a comete. For di falta di aprobacion di un business plan, te na e hecho cu mayoria inspectornan ta riba base contractual y tin 'falta di experiencia'. Esey ta haci nan capacidad limita. Tambe e tipo di inspeccion cu CCAA ta conduci, no ta corecto.  

INSELAIR INTERNATIONAL

E aeroliña, segun e rapport, tampoco no ta cumpli cu legislacion local di aviacion, cual legislacion ta vigente for di november 2015. E rapport ta mustra cu por lo menos 45 di e 80 pilotonan a bandona e compania. Y acerca ta bin e situacion financiero precario debi cu mester huur avionnan externo pa por sigui opera, y tin e debe habri di 100 miyon dollar cu Venezuela. 

GOBIERNO DI CORSOU

E situacion gubernamental di Corsou no a scapa di e rapport tampoco. "E situacion di e status di e legislacion di aviacion ta conoci na e ministerio respectivo, pero 'no tin ningun acto reconoci cu mester coregi e problemanan aki'. Y pa loke ta cooperacion entre e dos departamentonan di aviacion civil, esaki ta parse limita, 'siendo cu mirando e interes comun y manera cu InselAir ta organisa, e union aki mester tabata mas. 

 .