Dijksma: Situacion preocupante den aviacion Corsow y Aruba

DEN HAAG - Ta basa riba señal cu gobierno Hulandes a haya di KLM na december ultimo cu gobierno Hulandes a cuminsa actua riba e situacion di InselAir na Aruba y Corsou. Asina secretario di estado Hulandes Sharon Dijksma ta bisa den un carta cu ela manda pa Tweede Kamer awe diamars. Den un carta di 5 pagina, e mandatario ta contesta preguntanan di dos miembro di partido D66 unda cu e ta splica e situacion di aviacion civil na tanto Aruba como Corsou. Aki ta describi e situacion preocupante den aviacion di Corsou y Aruba. 

INFORMACION CONCRETO 

Ta aki ta resulta cu ta KLM ta esun cu a bin cu informacion 'concreto' riba e discrepancianan haya. Segun Dijksma no por a actua prome pasobra ta na december numa a ricibi informacion concreto, siendo cu ta for di november tabatin problema cu a conduci cu KLM a e.o. para e programa di 'codesharing' cu e compania. Algo cu miembronan di D66 a cuestiona den nan preguntanan.  Contestanan di colega di Corsou riba e situacion, no a convence e preocupacion di e mandatario na januari ultimo.  

INSPECCION CONDUCI PA ILT TA MUSTRA ALGO MALO

A sigui inspeccionan di inspectornan Hulandes di Inspectie Leefomgeving & Transport (ILT), conforme acuerdo cu tanto Aruba y Corsou na comienso di e luna aki. Mientras cu esaki a tuma lugar, tanto gobierno Mericano como esun di Hulanda a prohibi nan personal di bula riba avionnan di InselAir. "No por a impone un paro general pa tur hende, debi cu nos no tin nada concreto ainda den man pa hustifica esey" Dijksma a contesta NoticiaCla.com dialuna. Mientrastanto e resultado di e inspeccion ta cla y no ta mustra nada positivo pa departamento di aviacion civil di Corsou, mientras cu pa Aruba e ta un 'poco mas' positivo.