Croes: Whatsapp ta enemigo number uno di Setar

ORANJESTAD - Whatsapp ta e enemigo number uno di Setar. Asina director di e compania nacional di telecomunicacion, Roland Croes a bisa siman pasa. Durante e evento comercial anual di e compania, Croes a presenta su relato di aña y mustra con e.o. whatsapp ta un frustracion pa no solamente Setar sino tur compania di telecom na mundo. "Pero e ta e enemigo number uno di Setar", Croes a bisa. Mes momento e ta admiti cu no ta awor, sino for di 2014 Whatsapp tabatin  un efecto hopi negativo riba entrada di e servicio di 'voz'. 

WHATSAPP Y NETFLIX

Segun Croes, tanto e servicio di Whatsapp y Netflix (cine riba demanda) ta comiendo den e entrada continunamente. De hecho, uzando cifras, Croes ta mustra cu tin sigur un 3% di caida den entrada na servicio di voz." Y si nos combina entrada di servicio fiho y mobil, casi 70% di reduccion di entrada  ta debi na caida di entrada di servicio di voz".  Whatsapp ta evita cu un cliente mester uza e servicio di SMS (pa cual Setar y cualkier otro compania di telecom ta cobra). Ademas, cada bes ta bin un servicio extra manera uzo di voz, video y mas, tur ofreci gratis pa Whatsapp. Como tal ta logico cu ningun compania di telecom (incluyendo Setar), ta contento cu ne. De hecho, Croes a admiti cu no por haci nada contra esey. "Mi tin cu acepta e realidad. No tin nada cu un compania manera di nos por haci pa competi cu e OTT'nan (ta yama whatsapp y netflix como e 'over the top' providers). Pero si bo no cambia bo forma di haci negoshi, bo ta risca bira un comodidad" Croes a sigui bisa. "No tin garantia cu bo no lo bira uno. Pero no haci nada, sigur ta acelera e proceso" e director a sigui bisa. Esey tabata su 'hook' pa splica kico tur e compania cu e ta dirigi, ta haciendo pa sigura cu e por 'keda na bida'. 

MANTENE COMPANIA NA BIDA

Croes a repasa un lista di cosnan cu e compania ta haciendo y a haci, pa toch crea e diversidad necesario pa por 'genera trafico' 'recobra entrada perdi'. Entre nan, Croes ta menciona cu a logra conecta mas cliente residencial riba nan netwerk di cable digital. "Tur cliente corporativo ta conecta riba e red di fiber" Croes a sigui bisa, indicando cu e otro tipo di cliente tambe ta avansando. Tambe a añadi total di 25% celsites mas (toren cu ta percura pa señal di celular), aumenta e speed di internet, y pusha tur cliente pa uza e servicio di 'misetar' pa asina evita cu nan tin cu uza papel via post. Tur ta formanan cu ta pone e cliente ta mas activo online, cu ta e forma di biba den futuro.