Lo dicidi pronto si DIMP mes lo boet pa fayo di pago

ORANJESTAD - E simannan aki decision por cay si polis tin cu sigui subi caya pa controla number di auto paga, of si esey ta keda completamente den man di departamento di impuesto (DIMP). Asina directora di DIMP Luenne Gomez Pieters a splica NoticiaCla.com. E meta cu DIMP ta purbando di logra, ta pa nan mes (DIMP) tin e cobransa di impuesto di number di auto den nan control; algo cu e ley anterior no tabata permiti. Esey no ta kita afor cu ainda polis por sigui controla. "Nos mes por saca un cobransa tambe di impuesto, si e cliente no a paga. Esey no tabatin antes", Gomez a sigui bisa. E fecha mientrastanto di pago di prome kwartaal a vence siman pasa, y tin indicacion cu 65% di comunidad a paga, aunke e cifranan oficial tin cu sali e siman aki. 

DIMP ANTES TABATA 'MACHTELOOS'

Antes DIMP tabata 'machteloos' riba e cobransa (di impuesto riba number di auto), aunke nan por a mira den nan sistema cu un cliente a paga of no. "Ta polis lo mester (a) controla y duna boet. Den e caso aki mi lo por saca un cobransa di e suma cu e mester paga y por pone un boete tambe pa e cliente sa cu e tin cu paga na tempo" Gomez a sigui splica. E automobilista mientrastanto lo por sigui core auto normal, te ora cu yega na un punto cu no por mas, y cu DIMP por tuma otro tipo di accion. Gomez a compara e situacion cu p.e. un caso di aanmaning pa un persona cu tin cas y tereno, cu tin cu paga su grondbelasting, pero no ta pag'e y toch ta keda biba den e cas. "Nos no ta kita e cas for di bo, te ora cu e yega zover cu nos ta bisa cu nos a tuma tur e stappen di manda aanmaning etc" Gomez a continua bisando. E intencion pues ta pa kita e trabou di controle for di polis. "Bo ta trece e responsabilidad bek na e departamento cu tin cu raporta over di entrada". 

POLIS OF DIMP TA CONTROLA?

Segun e directora a splica e portal aki, DIMP por dicidi den e caso cu ora cu haci un analisis di e cifranan, por dicidi cu ta pone un cobransa y un boet, cu ta pone cu polis no mester boet mas, of ta dicidi cu ta polis ta controla y boet. E siman aki of despues, lo e desicion ey cay. E desicion no a cay ainda, pero a sigura cu tin suficiente hende pa atende cu e caso si dicidi cu polis no ta controla number di auto mas y cu e cobransa completo ta bay pa DIMP.