Plasterk ta topa Eman otro siman atrobe na Aruba

DEN HAAG - Otro siman diaranson prome minister di Aruba Mike Eman y minister di relacionan di Reino Ronald Plasterk ta topa otro atrobe personalmente na Aruba. Ta e prome encuentro personal desde cu nan a topa na Hulanda aña pasa riba e polemica cu a surgi encuanto nombracion di Gobernador Alfonso Boekhoudt. Fuentenan ta informa NoticiaCla.com cu fuera di e.o. un 'handshake' durante e ceremonia protocolario riba Dia di Betico luna pasa y na Universidad di Aruba recientemente unda cu nan a bolbe topa otro, Gobernador Boekhoudt y prome minister Eman no a topa otro mas, y no a reuni cu otro oficialmente, pero NoticiaCla.com no por a confirma e ultimo aki, mirando cu gabinete di Gobernador no ta haci anuncio riba esaki. Si ta berdad sinembargo cu nan no a topa, elo ta interesante mirando cu pa regla, nan mester topa un biaha pa siman. E mandatario Hulandes lo topa tambe cu Gobernador Boekhoudt durante su bishita cortico di 2 dia y minister di finanza Angel Bermudez. Esey ta otro encuentro cu ta hala atencion mirando cu ta nan prome encuentro, sigur despues cu Plasterk a rechasa e candidatura di Bermudez como Gobernador. Di otro banda, e encuentro ta riba e tema di finanza y CAft y lo no mester ta un problema. 

OTRO REUNIONNAN

Fuera di topa cu mandatarionan di Aruba, Plasterk lo topa cu prome minister di St Maarten Wiliam Marlin, unda cu lo mester dicidi si basa riba e reunion aki, St Maarten ta haya un 'aanwijzing' atrobe. Esaki pasobra nan ta resistiendo e idea pa un asina yama 'integriteitskamer'. Plasterk a declara caba cu elo no tin otro salida cu propone e 'aanwijzing' na Conseho di minister di Reino, si St Maarten rechasa e establecimento di e 'integriteitskamer'. Parce cu e combersacionnan aki lo ta e ultimo recurso, basa riba un entendimento mutuo. 

REUNION CU PROME MINISTER KOEIMAN

Diamars Plasterk lo topa cu prome minister demisionario di Corsou Hensley Koeiman, unda cu lo toca e situacion politico confuso, pero interesante cu ta tumando lugar ultimo dianan. Manera ta conoci siman a termina cu un gobierno minimo di 2 minister ora cu Parlamento a manda e resto di gabinete (4 minister) cas y a pidi pa 2 minister keda. Den practica, tin 2 minister so den gobierno, cu 9 ministerio, pendiente combersacionan cu Gobernador di Corsou Lucille George Wout lo tene otro siman. E foto ta di archivo di NoticiaCla.com durante e encuentro di Plasterk cu Eman durante Sail Aruba na mei 2015.