Meta Corp y subsidiario a celebra 'Hora Loca'

ORANJESTAD - Riba diabierna ultimo despues di 5’or di atardi MetaCorp y su subsidiarionan a drenta den “Hora Loca” na Balashi Beergarden. Tur empleado a prepara nan mes pa drenta den e ambiente di carnaval. Le Groove y Miniteca Metropolis a percura pa entretenimento y bon musica. E diferente companianan resortando bou MetaCorp y nan empleadonan a drecha nan T-shirtnan mustrando nan creatividad y tur esaki cu e tema di “Hora Loca.”

Pa esunnan cu a presenta cu e creacionnan mas loco di “Hora Loca” tabatin premio. E compania ta conoci pa regularmente tin evento pa su empleadonan, manera ta carnaval, hacimento di deporte hunto, dianan social, partimento di ham fin di aña, tiramento di pagara, celebracion ora di hubilarionan y hopi mas. Di berdad cu e empleadonan ta forma un famia grandi cu ta traha diariamente pa hiba nan mes y e companianan padilanti.