Trabounan di rehabilitacion ta cuminsando na CITGO Aruba

ORANJESTAD - Despues di a firma e acuerdo principal aña pasa, a sigui e proceso den cual Refineria CITGO Aruba ta scoge e consorcio di contratista principal, cu na su turno lo scoge e contratistanan local y trahadonan local pa cuminsa traha. E proceso ey a inicia awor y Refineria di Aruba, siendo e doño di e infrastructura tabata contento di experencia entrega di algo mas cu 100 badge diabierna ultimo pa empleadonan nobo den e refineria. Diabierna mainta e Lab-Building di Refineria CITGO a sirbi como centro di encuentro pa un grupo di trahadonan nobo cu ta den servicio awor pa e rehabilitacion di e planta di petroleo.  

A emplea mas cu 100 hende na Refineria CITGO pa medio di 4 diferente contratista grandi. Tin mas contratista na caminda, pues lo emplea mas trahado tambe. Actualmente Refineria CITGO ta haciendo e prome fase di trabounan di rehabilitacion cu ta encera preparacion y inspeccion como tambe calculacion di costo cu tin cu haci y defini ki tipo di trabounan tin cu prepara pa por bay ehecuta e proyecto.

Pa haci esaki lo contrata hopi trahado local. Den e siguiente simannan lo nota cu mucho mas hende lo haya trabou den diferente ramo cu awor ta limita na empleadonan den inspeccion, mecanica, ingenieria, planificacion y calculacion di costo. Cu tempo lo mira cu e trabou ta bay bira mas grandi y lo mira hopi lihe un escala di funcionnan cu lo wordo contrata pasobra trabou den refineria ta multi disciplinario. Ta premira den e lunanan nos dilanti lo emplea centenares di hende mas na trabou. Pa fin di aña lo surpasa 1000 hende trahando. Ya caba tin poco mas di 200 hende trahando den e refineria.