Prome bishita oficial di Gobernador Boekhoudt na Aeropuerto di Aruba

ORANJESTAD – CEO di Aruba Airport Authority N.V.  (AAA) Mr. James Fazio hunto cu e Management Team di AAA tawata tin e honor di duna bon bini na Su Excelencia Gobernador di Aruba Sr. Alfonso Boekhoudt na Aeropuerto pa un presentacion y un recorido di e ultimo proyectonan y reciente desaroyonan.

Gobernador Boekhoudt a ricibi un resumen di e proyectonan reciente y tambe esnan di futuro. Tambe Gobernador a haya un bista riba e retonan diario cu miembronan di autoridad gubernamental cu ta opera na Aeropuerto ta enfrenta, y con nan tin planea pa adapta y trece cambionan den futuro. Gobernador Boekhoudt a ricibi un caluroso bonbini di un y tur y a haya splicacion breve tocante nan contribucion na e sistema operacional di tur dia na Aeropuerto.

Gobernador Boekhoudt a keda impresiona cu e trabou den ekipo cu a keda demostra na nos Aeropuerto entre tur e diferente departamentonan cu ta traha hunto, pa asina garantisa un prome y ultimo impresion apropia di nos bishitantenan. E proyecto recientemente completa “Airport Arrival Enhancement Project” pa embeyece e sala di yegada na Aeropuerto ta un bon ehempel di un excelente trabou den ekipo y cooperacion, cu Gobernador Boekhoudt ta desea di mira den tur e futuro proyectonan na Aeropuerto. 

Staff y personal di Aeropuerto a keda encanta di por a fungi como anfitrion pa Su Excelencia Gobernador pa asina dun’e tur informacion di e reciente y futuro desaroyonan di Aeropuerto. Gobernador a mustra hopi interes, den sa con tur e departamentonan di autoridad ta traha hunto, uzando lo ultimo den tecnologia na nos disposicion. ‘Ya nos ta entusiasma pa e proximo bishita di Su Excelencia Mr. Alfonso Boekhoudt, como cu ela expresa di tin interes pa ricibi mas informacion riba aspectonan specifico di Aeropuerto,’ asina CEO di AAA Sr. James Fazio a remarca.